एजेन्सी । अमेरिक, रुस र युक्रेन बिचको अर्को त्रिपक्षीय वार्ता फेब्रुअरी १७–१८ मा जेनेभामा आयोजना हुने भएको छ । शनिबार क्रेमलिनका प्रवक्ता दिमित्रि पेस्कभले साे कुराकाे जानकारी दिएका हुन् । रुसको प्रतिनिधिमण्डलको नेतृत्व राष्ट्रपतिका सल्लाहकार भ्लादिमिर मेदिन्स्की गर्नेछन् ।
युक्रेनका मुख्य वार्ताकार रुस्तेम उमेरोभले सामाजिक सञ्जालमा जानकारी दिँदै भनेका छन्, “युक्रेनी टोली पूर्ण रूपमा गठन भइसकेको छ र यसमा सैन्य, राजनीतिक र सुरक्षा पक्षहरू समावेश छन् ।” उनले वार्ताको मुख्य उद्देश्य स्थायी र दिर्घकालीन शान्ति सुनिश्चित गर्नु रहेको स्पष्ट पारेका छन् ।
३ देशबिचको सुरक्षा सम्बन्धी पहिलो त्रिपक्षीय परामर्श जनवरी २३–२४ मा अबूधाबीमा सम्पन्न भएको थियो । जहाँ रुसको प्रतिनिधिमण्डलको नेतृत्व सैन्य खुफिया प्रमुख इगोर कोस्ट्युकोभले गरेका थिए ।
दोस्रो चरणको वार्ता फेब्रुअरी ४–५ मा अबूधाबीमा सम्पन्न भएको थियो । त्यसपछि अमेरिकी विशेष दूतले रुस र युक्रेनबिच ३१४ युद्धबन्दीको आदानप्रदानमा सहमति भएको जानकारी दिएका थिए ।
यस नयाँ चरणको वार्ता द्वन्द्व अन्त्य र शान्तिपूर्ण समाधानतर्फको सकारात्मक र महत्त्वपूर्ण पहलको रूपमा हेरिएको छ ।