गाेरखा । पूर्वराजा ज्ञानेन्द्र शाह आज हेलिकप्टर मार्फत काठमाडौं फर्किएका छन् । उनी करिब ३ महिनाको लामाे झापा बसाइ सकेर शुक्रबार काठमाडाैं फर्किएका हुन् ।
झापाको दमक नगरपालिका- ९ स्थित ‘मिनी दरबार’ (हिमालयन महालक्ष्मी टी-इस्टेट) मा बस्दै आएका शाहलाई लिन कैलाश एयरको हेलिकोप्टर पुगेको थियो ।
यसैबीच, पूर्वराजा शाहको स्वागतका लागि राष्ट्रिय प्रजातन्त्र पार्टी (राप्रपा) र विभिन्न राजावादी समूहहरूले त्रिभुवन अन्तर्राष्ट्रिय विमानस्थलमा भव्य प्रदर्शन र र्यालीसहितको तयारी गरेका थिए ।
उनीहरूले विमानस्थलबाट र्यालीसहित पूर्वराजालाई महाराजगञ्जस्थित निर्मल निवाससम्म पुर्याउने योजना बनाएका थिए ।
तर, सोही कार्यक्रमलाई लक्षित गर्दै जिल्ला प्रशासन कार्यालय काठमाडौंले सुरक्षा चुनौती र यात्रुको आवागमनलाई मध्यनजर गरी विमानस्थल आसपासको क्षेत्रमा १ महिना लामाे निषेधाज्ञा जारी गरेको छ ।
प्रशासनले जारी गरेको आदेशअनुसार अबको १ महिनासम्म विमानस्थल र त्यसको आसपासका क्षेत्रमा ५ जनाभन्दा बढी व्यक्ति भेला भई अनसन, धर्ना, घेराउ, जुलुस, प्रदर्शन वा सभा गर्न पाइने छैन ।
राप्रपाका नेताहरू र अन्य समर्थकहरूले भव्य स्वागतको आह्वान गरिरहेकै बेला प्रशासनले निषेधाज्ञा जारी गरेपछि विमानस्थल क्षेत्रको सुरक्षा व्यवस्था अत्यन्तै कडा पारिएको छ ।