गोरखा । प्रधानमन्त्री सुशीला कार्कीले आगामी निर्वाचनका लागि छिमेकी राष्ट्र भारतले पुर्याएको सहयोगप्रति आभार व्यक्त गरेकी छन् ।
मंगलबार सिंहदरबारमा नेपालका लागि भारतीय राजदूत नवीन श्रीवास्तवसँगको भेटमा उनले मुलुकको विशेष अवस्थामा हुन लागेको निर्वाचन सम्पन्न गर्न भारतले सवारी साधन लगायतका विभिन्न भौतिक सामग्री उपलब्ध गराएकोमा धन्यवाद दिएकी हुन् ।
भेटका क्रममा राजदूत श्रीवास्तवले नेपालको लोकतान्त्रिक प्रक्रियामा भारतको सदैव साथ रहने प्रतिबद्धता जनाएका छन् । उनले एक असल छिमेकीको नाताले नेपालको निर्वाचन र स्थिरताका लागि सहयोग गर्नु भारतको कर्तव्य भएको उल्लेख गरे ।
निर्वाचनपछि नेपालले हासिल गर्ने लोकतान्त्रिक र संवैधानिक स्थिरता छिमेकी राष्ट्रका रूपमा भारतका लागि पनि उत्तिकै महत्त्वपूर्ण हुने राजदूत श्रीवास्तवको भनाइ थियो ।
प्रधानमन्त्रीको निजी सचिवालयका अनुसार भेटमा द्विपक्षीय हित र आपसी सहयोगका विविध विषयमा समेत छलफल भएको थियो ।