गोरखा । राष्ट्रपति रामचन्द्र पौडेलले पूर्व प्रधानमन्त्री डा. बाबुराम भट्टराईका पिता एवं समाजसेवी भोजराज भट्टराईको निधनप्रति गहिरो दुःख व्यक्त गरेका छन् ।
मंगलबार एक शोक सन्देश पठाउँदै राष्ट्रपति पौडेलले स्वर्गीय भट्टराईलाई गाउँघरका दीनदुःखीको सहयोगी र एक असल अभिभावकीय व्यक्तित्वका रूपमा स्मरण गरेका हुन् ।
भोजराज भट्टराई श्री विन्ध्यवासिनी निमावि खोप्लाङका संस्थापक समेत थिए । राष्ट्रपतिले आफ्नो समवेदना सन्देशमा भट्टराईको सामाजिक योगदानको चर्चा गर्दै उनलाई एक सदाचारी समाजसेवीको संज्ञा दिएका छन् ।
पौडेलले स्वर्गीय भट्टराईको आत्माको चीरशान्तिको कामना गर्दै शोक सन्तप्त परिवारजनप्रति सहानुभूति प्रकट गरेका छन् ।
राष्ट्रपतिका प्रेस सल्लाहकार किरण पोखरेल र प्रमुख स्वकीय सचिव अवज्ञा पौडेलले पूर्व प्रधानमन्त्री डा. भट्टराईको निवास पुगेर उक्त समवेदना सन्देश हस्तान्तरण गरेका थिए । सो अवसरमा प्रथम महिला सबिता पौडेलको पनि उपस्थिति रहेको थियो ।
९७ वर्षको उमेरमा निधन भएका भट्टराईको योगदान र समाजप्रतिको निष्ठालाई राष्ट्रपतिले उच्च सम्मान व्यक्त गरेका छन् ।
