गोरखा । सुशीला कार्की नेतृत्वको सरकारले जेनजी आन्दोलनका घटना छानबिनका लागि गठन गरेको जाँचबुझ आयोगको म्याद फेरि थपिएको छ । सोमबार बसेको मन्त्रिपरिषद् बैठकबाट आयोगको म्याद तेस्रो पटक २५ दिनकाे म्याद थप्ने निर्णय भएको हो ।
सरकारले गत असोज ५ गते जेनजी आन्दोलनमा भएको बल प्रयोग लगायतका घटनाको छानबिन गर्न विशेष अदालतका पूर्वन्यायाधीश गौरीबहादुर कार्कीको नेतृत्वमा ३ सदस्यीय जाँचबुझ आयोग गठन गरेको थियो ।
३ महिनाको समय दिएर गठित आयोगले निर्धारण गरिएको समयमा काम नसकेपछि पुस ३ गते बसेको मन्त्रिपरिषद् बैठकले १ महिनाका लागि आयोगको म्याद थपेको थियो । त्यो समयमा पनि काम नसकेपछि माघ ८ गते बसेको मन्त्रिपरिषद् बैठकले आयोगको म्याद पुनः २० दिन थप्ने निर्णय गर्यो ।
त्यो समय बुधबार (माघ २८ गते) सकिँदैछ । यो समयमा पनि काम नसकिएपछि पुन थपिएको हो ।
पूर्वन्यायाधीश कार्की नेतृत्वको आयोगमा नेपाल प्रहरीका पूर्वएआईजी विज्ञानराज शर्मा र कानुनविद् विश्वेश्वरप्रसाद भण्डारी सदस्य छन् ।
गत भदौ २३ र २४ गते जेनजी आन्दोलनका क्रममा ७६ जनाले ज्यान गुमाएका थिए ।