गाेरखा । पर्साको वीरगञ्ज महानगरपालिका–१० मा रहेको एक अवैध गोदाममा छापा मार्ने क्रममा तस्कर समूहले आक्रमण गर्दा ३ जना सशस्त्र प्रहरी घाइते भएका छन् ।
आदर्शनगर स्थित रहेको मदनप्रसाद गुप्ताको घरमा कपडाकाे गाेदाममा छापा मार्ने क्रममा झडप भएको सशस्त्र प्रहरी बल नेपालका सशस्त्र प्रहरी नायब उपरिक्षक एवं सह-प्रबक्ता शैलेन्द्र थापाले जानकारी दिएको हाे ।
सशस्त्र प्रहरी बल नेपाल नम्बर १३ गण पर्सा, सीमा सुरक्षा गुल्म वीरगञ्ज र वीरगञ्ज भन्सार कार्यालयको संयुक्त टोलीले आज बिहान गोदाममा छापा मारेर भण्डार गरी राखेको ७ लाख रुपैयाँ बराबरको कपडा बरामद गरेको छ ।
कपडा बरामदपछि तस्कर समूहले आक्रमण गरेकाे सह-प्रवक्ता थापाले बताए । तस्कर समूहले ढुङ्गामुढा गर्दा सशस्त्र प्रहरी बल नेपालको एउटा वानटन र एउटा जीपमा समेत क्षति पुगेको छ ।
तस्बिर : सशस्त्र प्रहरी बल नेपाल