साँकेतिक तस्बिर
गोरखा । ओखलढुङ्गाको चिसंखुगढीमा राई दम्पतीको हत्या गरेर फरार भएका २ जनालाई प्रहरीले काठमाडौंबा६ पक्राउ गर्न सफल भएको छ । माघ १३ मा ओखलढुङ्गाको चिसंखुगढी गाउँपालिका–६ भदौरेस्थित बोहोरेमा चन्द्रविक्रम राई र चन्द्रमाया राई मृत अवस्थामा फेला परेका थिए ।
हत्यामा संलग्न आरोपमा प्रहरीको केन्द्रीय अनुसन्धान ब्युरोले भदौरे घर भएका ३४ वर्षीय धनबहादुर रानामगर र १७ वर्षीय बालकलाई पक्राउ गरेको छ ।
उनीहरूलाई काठमाडौँ महानगरपालिका–१५ स्थित डल्लुबाट शुक्रबार पक्राउ गरिएको केन्द्रीय अनुसन्धान ब्युरोले जनाएको छ ।
घरभित्र कोठामा हत्या गरेर सिरकले छोपेको अवस्थामा दम्पतीको शव भेटिएको घटना अनुसन्धान गर्न ब्युरोले माघ २० गतेबाट आफ्नो जनशक्ति परिचालन गरेको थियो । धनबहादुर रानाले लुटपाट गर्ने योजना बनाएर १७ वर्षीय बालकलाई काठमाडौँबाट ओखलढुङ्गा लिएर गएको प्रहरीको अनुसन्धानबाट थाहा भएको छ ।
आरोपीहरूले हत्यापछि लुटेको सुनको मारवाडी, सिक्री, १५९ थान रिचार्ड कार्ड र सि–माला बरामद गरेको छ । मृतक चन्द्रविक्रम राईले प्रयोग गर्ने गरेको मोबाइल पनि प्रहरीले आरोपीहरूको साथबाट बरामद गरेको छ ।