गोरखा । पृथ्वी राजमार्गअन्तर्गतको नागढुङ्गा–मलेखु सडकको काम सम्झौताअनुसार भएको भए पूरा भइसक्नुपर्ने थियो । तर सम्झौताको तीन वर्षमा ३७ प्रतिशत मात्र काम सकिएपछि आयोजनामा म्याद ६ महिना थप गरिएको छ ।
२०७९ साल पुस १५ गते ३ वर्षमा सम्पन्न गर्नेगरी यो सडक ठेक्का सम्झौता गरिएको थियो । मुग्लिन–नागढुङ्गा खण्डलाई ३ चरण बनाएर बोलपत्र आह्वान गरिएको थियो । तेस्रो चरणको म्याद गएको पुस १५ मा सकिएपछि ६ महिनाका लागि थप गरिएको हो ।
नागढुङ्गा–मुग्लिन सडक आयोजनाअन्तर्गत पश्चिम खण्ड मुग्लिन–मलेखु सडकका इन्जिनियर विजय दरैका अनुसार डिजाइनको तथ्याङ्क गलत पर्दा सडकको नक्साङ्कन फरक परेकाले समयमा काम गर्न नपाएको हुँदा निर्माण कम्पनीलाई १८३ दिन म्याद थप गरिएको छ ।
उनका अनुसार अहिलेका लागि नक्साङ्कनका विषयलाई सम्बोधन गर्दै समय थप गरिएको भए पनि अन्य विषय छलफलमा नै रहेको छ ।
धादिङको चरौदी क्षेत्रमा कालोपत्र भइरहेको छ । फिस्लिङलगायत क्षेत्रमा कालोपत्रको तयारी गरिएको छ । नाली, बेरियर, पुललगायत सडकका विभिन्न क्षेत्रका काम भइरहेका छन् । दरैकाअनुसार आयोजनाको तर्फबाट आवश्यक सहजीकरण गरेर थप भएको समयमा सक्ने गरी कामलाई तीव्रता दिन निर्माण कम्पनीलाई भनिएको छ ।
शर्मा–जेडआइसिजीले ४ अर्ब ८० करोड ५९ लाखमा यो खण्ड स्तरोन्नतिको ठेक्का पाएको हो । काठमाडौं प्रवेश गर्ने र बाहिरिने मुख्य नाकाका रूपमा नागढुङ्गा–मलेखु खण्ड विश्व बैंकको सहयोगमा बनाउन लागिएको हो ।