गाेरखा । पश्चिमी बायुका प्रभावका कारण आज देशैभरका उच्च हिमाली क्षेत्रमा हिमपात सुरु भएकाे छ । अहिले हुम्ला, जुम्ला, बैतडी, बागलुङ, मनाङ्ग, गाेरखा लगायत केही जिल्लामा बाक्लो हिमपात भएको छ ।
हुम्लाको सदरमुकाम सिमकोट र उत्तरी क्षेत्र नाम्खा गाउँपालिकामा हिजो बेलुकादेखि नै हिमपात भएको हो । त्यस्तै बैतडीका उच्च क्षेत्र सिगास, खोडपे, अनारखोली, ढोल्यामोडमा हिमपात भएको छ ।
मुस्ताङमा समेत हिजाे साँझदेखी परेकाे हिमपातका कारण मुक्तिनाथ दर्शन गर्न गएकाहरु प्रभावित भएका छन् ।
ती क्षेत्रमा माघयता दोस्रो पटक राम्रै हिमपात भएपछि गहुँलगायत हिउँदे बाली सप्रिने स्थानीयहरुकाे भनाइ छ ।
यस्तै बागलुङको ढोरपाटनसहित उच्च पहाडी क्षेत्रमा ठूलो हिमपात भएको छ । गएरातिदेखि बाक्लो हिउँ परेको हो । हिमपातले ढोरपाटन उपत्यकासहित आसपासका क्षेत्र सेताम्मे भएका छन् । ढोरपाटनसँगै निसीखोलाको रिग, पातीहाल्ने, खानीखोला, निसेलढोरमा पनि हिमपात भएको छ । तर चिसो अत्यधिक बढेपछि जनजीवन प्रभावित बनेको छ ।
यता गाेरखाकाे उत्तरी क्षेत्रमा समेत हिमपात सुरु भएकाे साम्दाेका स्थानिय निमा लामाले जानकारी दिए । उनका अनुसार हिमपात संगै बालबच्चा तथा बृद्ध र लार्केपास गर्न पुगेका स्वदेशी तथा विदेशी पर्यटकहरु प्रभावित भएका छन् ।