गाेरखा । तनहुँको शुक्लागण्डकी नगरपालिकामा आज एकैदिन २ जना पुरुष र १ जना महिलाको शव फेला परेको छ ।
प्रहरीले शुक्लागण्डकी–५ कसेरीस्थित शुक्लागण्डकी नगरपालिकाको फोहोरमैला प्रशोधन केन्द्रमा २ पुरुषको शव फेला परेको जनाएको छ भने अर्को १ महिलाको शव जनकल्याण माध्यमिक विद्यालयको तलपट्टी जंगल क्षेत्रमा भेटिएको इलाका प्रहरी कार्यालय बेलचौताराका प्रमुख प्रहरी निरीक्षक धननारायण श्रेष्ठले जानकारी दिए ।
फोहोरमैला प्रशोधन केन्द्रमा भेटिएका मृतकमध्ये शुक्लागण्डकी नगरपालिका–११ राइपुरका नारायण विकको पहिचान खुलेको छ । तर, सोही स्थानमा भेटिएका अर्को १ जना पुरुष र जनकल्याण मावि तलपट्टी जंगलमा भेटिएकी महिलाको पहिचान खुल्न नसकेको प्रहरीले जनाएको छ ।
प्रहरीका अनुसार तीनै जनाको शरीरमा चोट देखिएकाले घटनालाई शङ्कास्पद मान्दै हत्याको आशङ्का गरिएको अनुमान गरिएकाे छ । शवहरू सेती नदी किनार क्षेत्रमा फेला परेकाे हाे ।
प्रहरीको प्रारम्भिक अनुसन्धानअनुसार मृतकमध्ये १ जना सोही फोहोर प्रशोधन केन्द्रमा कार्यरत सुरक्षा गार्ड हुन् । उनी प्रायः केन्द्रभित्रै बस्ने गरेको भए पनि शव बाहिर फेला पर्नुले घटनालाई थप रहस्यमय बनाएको प्रहरीले जनाएको छ ।
अन्य २ जना खोला किनारतर्फ फोहोरकाे डिपो नजिकै बस्दै आएका व्यक्ति भएको खुल्न आएको छ । यद्यपि मृतकसँग परिचय खुल्ने कागजपत्र नभएकाले प्रहरीले आधिकारिक पुष्टि गर्न बाँकी रहेको प्रहरीको भनाई छ ।
घटनाको प्रकृति गम्भीर देखिएपछि जिल्ला प्रहरी कार्यालय तनहुँका एसपीसहितको टोली, गण्डकी प्रदेशको प्राविधिक टोली र तालिमप्राप्त कुकुरसहितको टोली घटनास्थलमा पुगेर अनुसन्धान अघि बढाइरहेको प्रहरी निरीक्षक श्रेष्ठले बताए ।