गाेरखा । सुनसरीको इटहरीस्थित एनआईसी एसिया बैंकभित्रै एक ऋणीले आत्मदाह प्रयास गरेका छन् ।
इलाका प्रहरी कार्यालय इटहरीका प्रहरी नायब उपरिक्षक सुवास हमालले पौडेलले बैंकमा पुगेर आफ्नाे शरिरमा आगो लगाउने प्रयास गरेको भन्दै अनुसन्धान भइरहेको बताए ।
उनका अनुसार इटहरी आइतबारेका लालबहादुर पौडेलले एनआईसी एसिया बैंकको इटहरीस्थित शाखा कार्यालयभित्र शरीरमा पेट्रोल छर्किन खोजेका हुन् । उनी बोतलमा पेट्रोल बोकेर बैंक गएका थिए ।
आफ्नै शरीरमा पेट्रोल छर्किन खोजेपछि उनलाई बैंकका कर्मचारी र दुर्गा प्रसाईँको नागरिक बचाउ अभियानका सदस्यले जोगाएका थिए । पौडेलले इटहरीमा रहेको जग्गा इटहरीकै व्यवसायी गंगाराम साह तेलीलाई धितोमा राख्न दिएको बुझिएको छ ।
झापामा मदिरा फ्याक्ट्री सञ्चालनका लागि भनेर साहले पौडेलसँग ब्याज दिने सहमतिमा धितो मागेका थिए । २ करोड ५० लाख रूपैयाँमा आफ्नो जग्गा धितो राखेपछि साहले ब्याज पनि नदिएको र किस्ता पनि नतिरेको पौडेलले बताएका छन् ।
जग्गा लिलामी प्रक्रियामा गएपछि आफूलाई तनावमा भएको उनको भनाइ छ । बैंकले बोलाएपछि लालबहादुरले दुर्गा प्रसाईँका केही कार्यकर्ता लिएर गएका थिए ।