गाेरखा । काठमाडौंका ठुला होटलहरूमा ग्राहकको मागअनुसार युवती दिने गरेको आराेपमा १ जना युवकलाई कारागार चलान गरिएकाे छ ।
दोलखाको मेलुङ गाउँपालिका–१ पवटी घर भई बूढानलीकण्ठ नगरपालिका–६ कपन बस्दै आएका ३९ वर्षीय आकाश भनिने कुलबहादुर कार्कीलाई कारागार चलान गरिएकाे हाे ।
काठमाडौं जिल्ला अदालका न्यायाधीश तिलकबहादुर कार्कीको बिहीबारको इजलासले कार्कीलाई पुर्पक्षका लागि सुन्धारास्थित केन्द्रीय कारागार जग्गनाथदेवल कारागार चलानको आदेश दिएको थियो ।
उनले आफ्नै कारमा राखेर युवतीहरू सप्लाई गर्दै उपत्यकाका विभिन्न होटलहरूमा पुर्याउने र मोटो रकम असुल्ने गरेकाे प्रहरीले बताएको थियो ।
कार्कीलाई २० मंसिरमा प्रहरी वृत्त गौशालाले सरस्वतीनगरबाट पक्राउ गरेको थियो । उनीमाथि अहिले मानव बेचबिखन तथा ओसारपसारको कसुरमा काठमाडौं जिल्ला अदालतबाट मुद्दा चलाइएको थियो ।
कार्कीले ठमेल, गौशाला, गोंगबु तथा एअरपोर्ट अगाडिका होटलहरूमा युवती सप्लाई गर्ने गरेको अनुसन्धानबाट खुलेको प्रहरीले जानकारी दिएकाे छ ।
होटलमा युवती सप्लाई गर्ने कार्कीविरुद्ध दुई युवतीले प्रहरीमा जाहेरी दिएका थिए । ती युवतीले भने आफूहरूलाई प्रलोभनमा पारेर ट्रयापमा पारी यौनधन्दामा लगाएको भन्दै उजुरी दिएको दिइएको थियो ।