एजेन्सी । बंगलादेशकी पूर्वप्रधानमन्त्री एवं बंगलादेश नेशनलिस्ट पार्टी (बीएनपी) की अध्यक्ष खालिदा जियाको ८० वर्षको उमेरमा निधन भएको छ । लामो समयदेखि बिरामी रहेकी जियाको आज बिहान उपचारका क्रममा निधन भएको हो । उनी विगत २० दिनदेखि भेन्टिलेटरमा रहेकी थिइन् ।
खालिदा जिया विगत केही वर्षदेखि छातीको संक्रमण, कलेजो, मिर्गौला, मधुमेह, बाथ र आँखा सम्बन्धी विभिन्न स्वास्थ्य समस्याबाट ग्रसित थिइन् । उनको निधनको पुष्टि परिवार र पार्टीका नेताहरूले गरेका छन् ।
सन् १९९१ देखि १९९६ र २००१ देखि २००६ सम्म गरी २ पटक बंगलादेशको प्रधानमन्त्री बनेकी जिया पूर्व राष्ट्रपति जिया-उर-रहमानकी पत्नी हुन् । उनी बंगलादेशको इतिहासमा पहिलो महिला प्रधानमन्त्री समेत हुन् ।
उनका जेठा छोरा एवं बीएनपीका कार्यकारी अध्यक्ष तारिक रहमान सन् २००८ देखि लन्डनमा बस्दै आएका थिए र उनी यसै महिना मात्र बंगलादेश फर्किएका छन् । उनका कान्छा छोरा अराफात रहमानको भने सन् २०१५ मा हृदयाघातका कारण निधन भइसकेको छ ।
फेब्रुअरी ८, २०१८ मा, ढाकाको विशेष अदालतले खालिदा जियालाई जिया अनाथालय ट्रस्टको नाममा सरकारी कोष हिनामिना गरेको आरोपमा ५ वर्षको जेल सजाय सुनाएको थियो । खालिदाका छोरा तारिक र अन्य ५ जना अभियुक्तलाई पनि १० वर्षको श्रम कारावासको सजाय सुनाइएको थियो ।
उनीहरूलाई २ करोड १० लाख बंगलादेशी टाका जरिवाना पनि लगाइएको थियो । तारिक र अन्य २ अभियुक्त भागे । जियाले यो निर्णयविरुद्ध उच्च अदालतमा अपिल गरिन् । अदालतले अक्टोबर ३०, २०१८ मा मुद्दाको सुनुवाइ गर्यो र सजाय बढाएर १० वर्ष पुर्यायो ।
त्यसपछि खालिदाले सजाय विरुद्ध पुनरावेदनको अनुमतिको लागि आवेदन दिइन्, जुन कानुनी कार्यवाहीको कारण ५ वर्ष ढिलाइ भएको थियो । शेख हसिनाको कूको १ दिनपछि, खालिदा जिया अगस्ट ६, २०२४ मा रिहा भइन् । त्यसपछि उनी राम्रो उपचारको लागि लन्डन गइन् । त्यहाँ ४ महिना बिताएपछि, उनी मे ६ मा देश फर्किएकी थिइन् ।