एजेन्सी । दक्षिणी मेक्सिकोको ओक्साका राज्यमा भएकाे एउटा भयानक रेल दुर्घटनामा परी १३ जनाको ज्यान गुमाएकाे छ भने अन्य ९८ जना घाइते भएका छन् । रेल लिकबाट उछिट्टिँदा इन्जिन पल्टिएको छ र धेरै डिब्बाहरू पल्टिएका छन् ।
रेल मेक्सिकोको खाडी र प्रशान्त महासागरलाई जोड्ने नयाँ रेलमार्गमा यात्रा गरिरहेको थियो । यो रेलवे लाइन मेक्सिकन नौसेनाले सञ्चालन गर्छ ।
मेक्सिकन नौसेनाका अनुसार रेलमा ९ जना चालक दलका सदस्यसहित २५० जना सवार थिए । दुर्घटना चिभेला र निजान्डा शहरहरू बीचको घुमाउरो मोडमा भएको थियो ।
घाइतेमध्ये ३६ जनाको अस्पतालमा उपचार भइरहेको छ । राष्ट्रपति क्लाउडिया शेनबाउमले सामाजिक सञ्जाल प्लेटफर्म एक्समा घाइतेमध्ये ५ जनाको अवस्था गम्भीर रहेको बताएकी छिन् । उनले मृतकका परिवारलाई सहयोग गर्न वरिष्ठ अधिकारीहरूलाई घटनास्थलमा जान आदेश दिएकी छिन् ।