राजु लामा/दोहा–कतार । कतार र ईरान क्षेत्रमा रहेका नेपालीलाई अनौपचारिक माध्यमबाट गरिने विप्रेषण कारोबार (हुण्डी) नगर्न नेपाली राजदूतावास कतारले आग्रह गरेको छ ।
राजदूताबासले हुण्डी कारोबार असुरक्षित, गैरकानूनी तथा राष्ट्रहित विपरीत हुने स्पष्ट समेत गरेको छ ।
राजदूताबासले हिजो आइतबार जारी सूचनामा सम्पत्ति शुद्विकरण तथा आतङ्ककारी कार्यमा बित्तिय लगानी निवारणका लागि अनौपचारिक च्यानल वा माध्यम प्रयोग गरी हुने विप्रेषण कारोबार रोक्नु नेपाल सरकारको अन्तराष्ट्रिय दायित्व रहेको उल्लेख गरेको छ ।
सोही अनुसार विदेशमा रही अनौपचारिक माध्यमबाट हुण्डी कारोबारमा संलग्न ब्यक्तिहरुको विवरण संकलन गरी सोहीअनुसार विदेशमा रही अनौपचारिक माध्यमबाट हुण्डी कारोबारमा संलग्न व्यक्तिहरूको विवरण संकलन गरी आवश्यक कारबाहीका लागि एकीकृत अभिलेखीकरण गर्ने काम सम्बन्धित निकायले गरिरहेको जनाइएको छ ।
सूचनामा करात र ईरान क्षेत्रमा रहेका नेपाली व्यक्ति वा संस्थाले नेपालमा रकम पठाउँदा वा नेपालबाट रकम ल्याउँदा अनिवार्य रूपमा बैंकिङ च्यानलको मात्र प्रयोग गर्न अनुरोध गरिएको छ ।
साथै, कुनै व्यक्ति वा संस्थाले अनौपचारिक च्यानलमार्फत हुण्डी कारोबार गरेको जानकारी भए त्यस्ता व्यक्ति वा संस्थाको विवरण राजदूतावासको इमेल ठेगानामा पठाउन आग्रह गरिएको छ ।
हुण्डी कारोबारसम्बन्धी सूचना उपलब्ध गराउने व्यक्तिको विवरण गोप्य राखिने राजदूतावासले जनाएको छ ।
