एजेन्सी । भारतको उत्तर प्रदेश मुजफ्फरनगर जिल्लामा एउटी १५ वर्षीया किशोरीको हृदयघातका कारण ज्यान गएको छ ।
परिवारले छिमेकीको बिहेमा बजेको चर्को डिजेको आवाज र त्यसको कम्पन सहन नसकेर छोरीलाई हृदयघात भएको आरोप लगाएका छन् । पीडित परिवारले मुख्यमन्त्री योगी आदित्यनाथसँग न्यायको लागि गुहार लगाएका छन् ।
आजतकको रिपोर्टअनुसार यो घटना मुजफ्फरनगर जिल्लाको अहरोडा गाउँको हो । डिसेम्बर १२ मा गाउँकै एक परिवारमा बिहे थियो, जसका लागि ठुला–ठुला डिजे मगाइएका थिए ।
परिवारले लगाएको आरोपमा डिजेको चर्को आवाज र भारी बेसको कम्पन १५ वर्षीया राशीले सहन सकिनन् र उनको स्वास्थ्य अचानक बिग्रिएको भनिएको छ । परिवारले उनलाई उपचारका लागि मुजफ्फरनगर लगेका थिए, जहाँ उनको मृत्यु भयो । राशी कक्षा ९ की छात्रा थिइन् ।
राशीको मृत्युले परिवारमा शोक छाएको छ । मृतकका हजुरबुबा अजय पाल सिंहले गाउँमा यसअघि पनि चर्को डिजेको आवाजका कारण मानिसहरूको ज्यान गएको दाबी गरेका छन् ।
उनको आरोप छ– डिजेको चर्को आवाज सामान्य मानिसहरूका लागि आतंक बनेको छ । उनले भने, ‘आवाज यति चर्को थियो कि जनावरहरूले पनि खम्बा उखेलेका थिए । यसअघि पनि ३-४ पटक डिजेको आवाजले गाउँका धेरै मानिसहरूको ज्यान गइसकेको छ । गाउँमै एक मनवीर मास्टर थिए, उनको पनि डिजेको चर्को आवाजले ज्यान गएको थियो ।’
यद्यपि डिजेको चर्को आवाजका कारण हृदयघात भएको हो वा होइन भन्ने पुष्टि भने भएको छैन । परिवारले यस मामिलामा प्रहरीमा कुनै उजुरी दर्ता नगरी बालिकाको अन्तिम संस्कार गरिसकेका छन् ।
पीडित परिवारले मुख्यमन्त्री योगी आदित्यनाथसँग बिहे तथा अन्य समारोहहरूमा बज्ने चर्को डिजेमाथि कडा नियन्त्रण लगाउन माग गरेका छन् ।