काठमाडाैं । नेपाल प्रिमियर लिगका लागि टिकट दर सार्वजनिक गरिएको छ ।
नेपाल क्रिकेट एसोसिएसन (क्यान)ले हिजो प्रेस विज्ञप्ति निकाल्दै आउँदो मंसिर १ देखि २७ गतेसम्म कीर्तिपुरमा हुने दोस्रो नेपाल प्रिमियर लिगका लागि टिकट दर सार्वजनिक गरेको हो ।
उद्घाटन तथा शनिवारको खेलको साधारण टिकट ५०० र प्रिमियम अर्थात् भीआईपी टिकट १ हजार ५०० रुपैयाँ तोकिएको छ ।
अन्य समूह चरणमा साधारणतर्फ ५०० र भीआईपीतर्फ १ हजार रुपैयाँ रहनेछ । प्लेअफ तथा फाइनलका लागि साधारणतर्फ १ हजार र भीआईपीतर्फ २ हजार रुपैयाँ तिर्नुपर्ने क्यानले जनाएको छ ।
साथै सिजनभरको पास १५ हजार रुपैयाँमा किन्न सकिनेछ । टिकट बिक्री खल्ती र आईएमई एपमार्फत हुने क्यानले निकालेको विज्ञप्तिमा भनिएको छ ।
