मोरङ । नेकपा (माओवादी केन्द्र) कोशी प्रदेश संसदीय दलका नेता इन्द्रबहादुर आङ्बोको गाडीले ठक्कर दिँदा मोटरसाइकल चाकलको ज्यान गएको छ । आङ्बोले प्रयोग गर्दै आएको को १ झ ६५० नम्बरको सरकारी गाडीले आज दिउँसो १२:१५ बजे भएकाे दुर्घटना परी ग्रामगान गाउँपालिका–५ का अन्दाजी ३५ वर्षीय प्रवेश चौधरीको ज्यान गएको हाे ।
कोशी प्रदेशसभा सचिवालयले प्रमुख प्रतिपक्षी दलको नेताको हैसियतमा उपलब्ध गराएको गाडी आङ्बोले चढ्दै आएका थिए । सरकारी गाडीको ठक्करबाट चौधरीको ज्यान गएको जिल्ला प्रहरी कार्यालय मोरङका प्रहरी नायब उपरिक्षक एवं सूचना अधिकारी कोपिला चुँडालले बताइन् ।
उनका अनुसार उक्त गाडी विराटनगरबाट विराटचोकतर्फ जाँदै गर्दा बाटो क्रस गर्दै गरेको को ९ प ७९ नम्बरको मोटरसाइकलाई ग्रामथान–५ ककडमाडीमा ठक्कर दिएको थियो ।
तीव्र गतिमा रहेको गाडीको ठक्करबाट गम्भीर घाइते भएका चौधरीलाई स्थानीयले उद्धार गरेर उपचारका लागि विराटनगरको विराट नर्सिङ होम पठाएका थिए । विराट नर्सिङमै उपचारका क्रममा दिउँसो ३:१५ बजेतिर चिकित्सकले मृत घोषित गरेको सूचना अधिकारी चुँडालले बताइन् । माओवादी कोशी प्रदेश संसदीय दलका नेता आङ्बो प्रदेशका पूर्वआर्थिक मामिला तथा योजना मन्त्रीसमेत हुन् ।
ठक्कर दिने गाडी र चालक पाँचथरको फाल्गुनन्द गाउँपालिका–१ का अन्दाजी ४० वर्षीय गम्भीरमान सार्कीलाई नियन्त्रणमा लिएर अनुसन्धान अघि बढाएको छ ।