चितवन । चितवनकाे पुल्चाेक र नवलपुरकाे गैडाकाेट जोड्ने नारायणी नदी माथी निर्माण गरिने नयाँ पुलको डिजाइन स्वीकृत भएको छ । सडक विभाग अन्तर्गतको पुल महाशाखाले ‘केबल–स्टेड’ डिजाइनमा निर्माण हुने उक्त पुलको डिजाइनलाई स्वीकृति दिएको हाे ।
२०० वर्षसम्म टिक्ने र ठुलो बाढी तथा पानीजहाज सञ्चालनलाई समेत ध्यानमा राखेर डिजाइन गरिएको यो पुलको निर्माण मंसिरदेखि सुरु हुने भएकाे छ । महाशाखाका इन्जिनियर अमितकुमार बर्माका अनुसार असोज अन्त्यतिर पुलको डिजाइन स्वीकृत भएको थियो ।
डिजाइन स्वीकृत भएसँगै निर्माण कार्य अघि बढाउने तयारी भइरहेको छ । ‘ड्रइङ एप्रुभ भइसकेको छ, अब निर्माण व्यवसायीले आफ्नो निर्माण तयार गरिरहेका छन्,’ बर्माले भने, ‘छिट्टै नै निर्माण कार्य सुरु हुनेछ ।’
२०८० जेठ १९ गते तुँदी कन्स्ट्रक्सन प्रालिसँग १ अर्ब ६८ करोड ७६ लाख २३ हजार ३५४ रुपैयाँमा पुल निर्माणका लागि सम्झौता भएको थियो । सम्झौताअनुसार पहिलो वर्ष डिजाइन गर्ने र बाँकी ३ वर्षमा पुल निर्माण सम्पन्न गर्ने लक्ष्य थियो । तर डिजाइनमै करिब साढे २ वर्ष लागेको छ ।
इन्जिनियर बर्माका अनुसार नयाँ पुल ४२० मिटर लामो हुनेछ । यसमा ४ वटा पिलर रहनेछन्, जसमध्ये २ छेउका पिलरहरू १००–१०० मिटरको दूरीमा र बीचको स्पान २२० मिटरको हुनेछ । यो पुललाई हाल २ लेनमा र भविष्यमा ३ लेनमा निर्माण गर्ने गरी ध्यानमा राखेर डिजाइन गरिएको छ । साथै १ लेन फुटपाथ रहनेछ ।
‘यो दुई लेनको पुल हो, जसमा एक लेन फुटपाथका लागि पनि छुट्याइएको छ,’ बर्माले भने, ‘तर भविष्यमा ट्राफिक चाप बढ्यो वा हालको पुरानो पुलमा समस्या आएमा यसलाई तीन लेनका रूपमा सजिलै प्रयोग गर्न सकिन्छ ।’
यस्तै भविष्यमा तलबाट पानीजहाज चलाउनुपर्ने भयो भने त्यो पनि सम्भव हुने गरी यो पुलको डिजाइन गरिएको बर्माको भनाइ छ ।
‘जति ठुलो बाढी आएपनि त्यो बाढीले क्षति नगर्ने किसिमको पुल निर्माण हुनेछ । यो दुई वर्षदेखि नेपालमा अत्यधिक पानी पर्ने र ठुलो बाढी आएर पुलमा क्षति पुग्ने समस्या भइरहेको छ,’ बर्माले भने, ‘अब यो पुल बाढीले क्षति गर्न नसक्ने किसिमको डिजाइन गरिएको छ ।’
हाल नारायणी नदी माथी पुल जीर्ण अवस्थामा छ । याे पुल २०३७ मा बनाइएकाे थियाे ।