सिन्धुली । सिन्धुलीको दुधौली नगरपालिका–४ लक्ष्मीपुरमा २ वटा मोटरसाइकलसँग मालबाहक ट्रक ठोक्किँदा २ जनाको ज्यान गएको छ भने अन्य ४ जना घाइते भएका छन् ।
बुधबार दिउँसो मदन भण्डारी राजमार्गमा भिमानबाट दुधौलीतर्फ जाँदै गरेको नाप्र१–०२–००२ ख ४११ ट्रक र विपरीत दिशाबाट आएका नाप्र २–०१–००१ प २१४२ र मप्र ०२–००६ प ५८४१ को दुईवटा मोटरसाइकल ठोक्किँदा दुर्घटना भएको इलाका प्रहरी कार्यालय डकाहाले पुष्टी गरेको हाे ।
इलाका प्रहरी कार्यालय डकाहाका प्रहरी निरीक्षक सपना खड्काका अनुसार दुर्घटनामा दुधौली नगरपालिका–११ टाडीका ३४ वर्षीय रामकुमार कुमर र सोही क्षेत्रका २५ वर्षीय फुलबाबु धामीको दुधौली नगर अस्पताल सिर्थौलीले मृत घोषणा गरेको हाे ।
उनका अनुसार दुधौली–३ का २६ वर्षीय विप्लव धामी, सोही ठाउका २७ वर्षीय बुद्धि थारू, २५ वर्षीय सुनिल माझी र ३२ वर्षीय कुशे धामी घाईते भएका छन् । तीमध्ये विप्लव, बुद्धि र कुशेको अवस्था गम्भीर रहेको प्रहरीले जनाएको छ ।
दुर्घटना लगत्तै मप्र ०२–००६ प ५८४१ नम्बरको मोटरसाइकलमा आगलागी भएकाे र माेटरसाइकल पूर्णरूपमा क्षतिग्रस्त भएको छ ।
दुर्घटनापछि ट्रक र चालक प्रहरी नियन्त्रणमा लिइएको छ । घटनाको अनुसन्धान सुरु गरिएको जिल्ला प्रहरी कार्यालय सिन्धुलीले जनाएको छ ।