फाईल तस्बिर
गोरखा । गोरखा सदरमुकाममा भोलीदेखी तेस्रो कृषि, पर्यटन तथा ब्यापार प्रबर्द्वन मेला २०८२ सुरु हुने भएको छ । मेलाको आयोजना गोरखा चेम्बर अफ कमर्स र नेपा ओमन चेम्बर अफ कमर्स गोरखाले आयोजना गरेको हो ।
मेलाको सबै तयारी पुरा भएको गोरखा चेम्बर अफ कमर्स अध्यक्ष राम स्वरुप श्रेष्ठले बताए । उनका अनुसार मेला आउदो ३० गतेसम्म सञ्चालनमा आउने छ ।
गोरखा नगरपालिका–६ को खेलकुद मैदानमा हुने मेलाको उदघाटन गोरखा नगरपालिकाका मेयर कृण्ण बहादुर राना मगरले गर्ने गोरखा चेम्बर अफ कमर्सले जनाएको छ ।
कार्यक्रम अनुसार पहिलो दिन भोली बिहान ११ विभिन्न जातजातिहरुका कला, सँस्कृति झल्कने साँस्कृतिक झाँकीहरु, महिला समूह, संघ संस्थाहरु सम्मिलित झाँकीले गोरखा बजारको परिक्रममा गर्ने छ ।
मेला अवधिभर ३० देखी ३२ हजार मानिसले अबलोकन गर्ने अनुमान गरिएको छ । मेलामा करिब ४ करोडको कारोबार हुने अनुमान समेत गोरखा चेम्बर अफ कमर्सले गरेको छ ।
१५० वटा स्टल भएको मेलामा कृषि प्रदर्शनीका लागि १० वटा, होटल तथा रेष्टुरेन्टका लागि ६ वटा र बाँकी अन्य प्रयोजनकालागि प्रयोग हुने भएको छ ।
मेलामा बाल उद्यान, खेल तथा मनोरञ्जन, पिङका साथै कृषि उपज, घरेलु उत्पादन, हस्तकला, प्रविधि, पर्यटन तथा सेवा क्षेत्रका बस्तुहरु राखिने पनि अध्यक्ष श्रेष्ठले जानकारी दिए ।