फाईल तस्बिर
गोरखा । सवारी नियम उल्लघंन गर्ने करिब १५ सय सवारी कारवाहीमा परेका छन् । यो आर्थिक बर्षको साउन, भाद्र र असोज महिनामा १ हजार ४६८ सवारी साधन कारवाहीमा परेको जिल्ला ट्राफिक प्रहरी कार्यालय गोरखाले जानकारी दिएको हो ।
कारवाहीमा पर्नेमा ट्रक, टिपर, बस, कार, जिप, ट्याक्टर, मोटरसाइकल र अन्य सवारी साधन परेको जिल्ला ट्राफिक प्रहरी कार्यालय गोरखाका प्रमुख प्रहरी नायब निरिक्षक सुरज अर्यालले बताए ।
‘साउन यता मात्रै करिब १५ सय सवारी साधन कारवाहीमा परेका छन्’ उनले भने ‘सबैभन्दा धेरै मोटरसाइकल र कारजिपहरु कारवाहीमा परेका छन ।’ साना सवारीले ट्राफिक नियमानुसार सञ्चालन नगर्दा कारवाहीमा परेको पनि उनले जानकारी दिए ।
सवारी साधनको कागजपत्र दुरुस्त नभएको, यात्रु संग बढी भाडा असुल गरेको, क्षमताभन्दा बढी यात्रु लिएर हिडने गरेको, सवारी साधनको स्वरुप परिवर्तन गरेको, सवारी चालक अनुमती पत्र नभएकाले सवारी चलाएका तथा सवारी नियमभन्दा बाहिर रहेर सवारी चलाएका सवारी चलाक र सवारी साधन कारवाही परेको कार्यालयले जनाएको छ ।
प्रमुख अर्यालका अनुसार साउन महिनामा मात्रै ७५ ट्रक/टिपर, ४७ बस, ११६ कार/जिप, २५ ट्याक्टर, २६९ मोटरसाइकल र ३ अन्य सवारी साधन कारवाहीमा परेका थिए ।
त्यस्तैगरी, भाद्र महिनामा ६८ ट्रक/टिपर, ९७ बस, ११९ कार/जिप, ३० ट्याक्टर, २२४ मोटरसाइकल कारवाहीमा परेको कार्यालयले जानकारी दिएको छ ।
यता असोजम महिनामा मात्रै ४४ ट्रक/टिपर, ८४ बस, १०३ कार/जिप, २३ ट्याक्टर, १३९ मोटरसाइकल र २ अन्य सवारी साधन कारवाहीमा परेको थियो ।
कार्यालयले उपलब्ध गराएको तथ्यांकलाई हेर्दा गएको ३ महिनामा मात्रै १८७ ट्रक/टिपर, २२८ बस, ३३८ कार/जिप, ७८ ट्याक्टर, ६३२ मोटरसाइकल र ५ अन्य सवारी साधन कारवाहीमा परेको देखिन्छ ।
कार्यालयले यो अबधिमा कारवाहीमा परेका सवारी साधनबाट १३ लाख ५९ हजार रुपैयाँ राजश्व संकलन गरेको छ ।