सोलुखुम्बु । सोलुखुम्बु जिल्लाको भिरकुनामा हिजाे बेलुका भएकाे जीप दुर्घटनामा परी ३ जनाको ज्यान गुमाएका छन् । बाग्मती प्रदेश–०१–०३१–च–५९२५ नम्बरको जीप माप्यदूधकोशी गाउँपालिका–६ भिरकुनामा दुर्घटनामा भएको साेलुखुम्बु प्रहरीले जनाएकाे हो ।
प्रहरीका अनुसार ज्यान गुमाउने ३ जनामध्ये अहिलेसम्म २ जनाको मात्रै पहिचान खुलेको छ । पहिचान खुलेकाहरुमा महाकुलुङ गाउँपालिका–३ छेस्काम घर भएकी १६ वर्षीया हबी राई र त्यहि ठाउँकी २० वर्षीया शान्ति राई रहेको जिल्ला प्रहरी कार्यालय सोलुखुम्बुका प्रहरी निरिक्षक एवं सूचना अधिकारी लोकबहादुर दियालीले बताए ।
ज्यान गुमाउने अर्की १ किशोरीको पहिचान खुल्न बाँकी रहेकाे उनले बताए । दुर्घटनामा चालक श्रीध्वज राईसहित ६ जना घाइते भएका छन् । घाइतेमध्ये ४ जनाको जिल्ला अस्पताल फाप्लुमा उपचार भइरहेको छ । २ जना उपचारपछि घर फर्किएकाे प्रहरीले जनाएकाे छ ।
प्रहरीले घटनाका सम्बन्धमा आवश्यक अनुसन्धान सुरु गरेकाे जनाएकाे छ ।