भरतपुर । रत्ननगर नगरपालिका–९ टिकौली जंगलमा मङ्गलबार साँझ बस र कार एकआपसमा ठोक्किँदा १ जनाको ज्यान गएको छ भने अन्य ५ जना घाइते भएका छन् ।
इलाका प्रहरी कार्यालय रत्ननगरका अनुसार नारायणगढबाट टाँडीतर्फ जाँदै गरेको ना ३ ख ९९८६ नम्बरको मिनिबस र विपरीत दिशाबाट आइरहेको BAB ५००८ नम्बरको कार एक आपसमा ठोक्किँदा दुर्घटना भएको हो ।
दुर्घटनामा बसमा सवार चितवन रत्ननगर–१० निवासी ३३ वर्षीया पुजा सुबेदीको भरतपुर सरकारी अस्पतालमा उपचारको क्रममा साँझ ५:५५ बजे ज्यान गएको प्रहरीले जनाएको छ ।
बसमा सवार अन्य ५ जना घाइते भएका छन् । उनीहरूको उपचार नयाँ मेडिकल कलेज, भरतपुरमा भइरहेको छ । प्रहरीले दिएकाे जानकारी अनुसार बस चालक राप्ती न.पा.–२ का सुरज कडेल, गाेरखा जिल्ला गण्डकी गाउँपालिका-५ का भोजराज कार्की, चितवन रत्ननगर–७ का प्रभु नारायण महतो, उनका छोरा रियान महतो, गाेरखा जिल्ला बारपाक सुलिकाेट गाउँपालिका-३ का भोजराज काप्री, भरतपुर-१२ की शोभा आचार्य, उनकी छोरी सदिक्षा आचार्य र गाेरखा जिल्ला बारपाक सुलिकाेट गाउँपालिका-३ का माईता गुरुङ रहेका छन् ।
दुर्घटनामा संलग्न कार चालक काठमाडौँ तारकेश्वर–१० निवासी ४४ वर्षीय सुवास भण्डारीलाई प्रहरीले नियन्त्रणमा लिएको छ । दुबै सवारीसाधन घटनास्थलमै रहेका छन् भने सडकमा कुनै अवरोध नभएको प्रहरीले जनाएको छ । दुर्घटनाका सम्बन्धमा प्रहरी अनुसन्धान सुरु गरेकाे जनाएकाे छ ।