फाईल तस्बिर
गोरखा । गोरखा प्रशासनले सूचना जारी गर्दै तिहारको बेला बिहान ७ बजेदेखी राती ९ बजेसम्म मात्र देउसी भैलो खेल्न भनेको छ । प्रशासनले हिजो जारी गरेको सूचनामा उक्त कुरा भनेको हो ।
प्रमुख जिल्ला अधिकारी रामु राज कडरियाले हस्ताक्षर गरेको सूचनामा ‘जिल्लाको समग्र शान्ति सुरक्षाको अवस्थालाई मध्यनजर गरी देउसी भैलो, नाचगान लगायतका साँस्कृतिक क्रियाकलापहरु बिहान ७ बजेदेखी बेलुका ९ बजेसम्म मात्र सञ्चालन गर्नु गराउनुहुन’ भनेको छ ।
आसन्त तिहार तथा छठ जस्ता चाडपर्व मनाउने क्रममा कसैको इच्छा चाहना बिरुद्वका क्रियाकलाप तथा समाजमा अशोभनिय कार्य नगरी स्वतन्त्र र खुशीयाली पूर्वक चाडपर्व मनाउन, शान्ति सुरक्षा एवं अमनचयनको अवस्था कायम गरी राख्न समेत सूचनामा भनेको छ ।
सूचनामा पटका, अतिसबाजी जस्ता बिस्फोटक पदार्थहरुको आयात, ओसारपसार, बिक्री बितरण तथा प्रयोग नगर्न तथा मादक पदार्थको सेवन गरी शान्ति सुरक्षा एवं सर्व साधारणलाई असर पर्ने गरी सार्वजनिक स्थानमा होहल्ला गर्ने एवं झै–झैगडा गर्नेलाई प्रचलित कानून बमोजिम कारवाही गरिने भनेको छ ।
त्यसका साथै, भिडभाड तथा हुलहुज्जत जस्ता गतिविधी गरी समाजमा अशान्ति एवं अशोभनिय क्रियाकलाप तथा अखाद्य रंग मिलाउका मिठाई, झिलाङ्गे रोटी र म्याद गुज्रेका भाईमसला, प्लास्टिक जन्य फुलमालाको प्रयोग र बिक्री बितरण समेत नगर्न सूचनामा भनेको छ ।
