काठमाडौं । इजरायली सेनाले बन्धक विपिन जोशीको हमासद्वारा हत्या भएको दाबी गरेको छ । इजरायल डिफेन्स फोर्स (आईडीएफ)ले गाय इलुज, विपिन जोशी र अन्य दुई मृत बन्धकहरूका परिवारहरूलाई शव दाहसंस्कारका लागि फिर्ता ल्याइएको जानकारी गराउँदै यस्तो भनेको हो । अन्य दुई बन्धकका नामहरू भने परिवारहरूले सार्वजनिक नगर्न भनेका आईडीएफले जनाएको छ ।
आईडीएफका अनुसार विपिनलाई २३ वर्षको उमेरमा किबुत्ज अलुमिमको आश्रयस्थलबाट हमासले अपहरण गरेको थियो । इजरायली सेनाको प्रारम्भिक अनुमानअनुसार युद्धको पहिलो महिनामा बन्धक अवस्थामा उनको हत्या गरिएको हो । राष्ट्रिय फरेन्सिक मेडिसिन केन्द्रद्वारा मृत्युको परिस्थितिको परीक्षण पूरा भएपछि यस सम्बन्धमा अन्तिम निष्कर्षहरू निर्धारण गरिने सेनाले बताएको छ ।
यसैगरी गाय इलुज नोभा म्युजिक फेस्टिभलबाट भागेपछि हमासद्वारा घाइते अवस्थामा अपहरण गरिएका थिए । आईडीएफलाई उपलब्ध जानकारी र गुप्तचर अनुसार उचित चिकित्सा उपचार नपाएका कारण बन्धक हुँदा लागेको चोटका कारण उनको मृत्यु भएको हो । उनको मृत्यु हुँदा उनी २६ वर्षका थिए ।
आईडीएफले परिवारहरूप्रति गहिरो समवेदना व्यक्त गरेको छ र सबै बन्धकहरूलाई फिर्ता ल्याउन हरसम्भव प्रयास गरिरहेको बताएको छ । सेनाले हमासले सम्झौताको आफ्नो अंश पूरा गरी सबै बन्धकलाई उनीहरूका परिवारमा उचित दाहसंस्कारका लागि फिर्ता ल्याउन आवश्यक प्रयास गर्नुपर्नेमा जोड दिएको छ ।