साँकेतिक तस्बिर
सिरहा । कल्याणपुर नगरपालिका-८ काे अरङमा दलित परिवारको ५ वटा घर भत्काएको आरोपमा वडाध्यक्ष पक्राउ परेका छन् ।
घटनामा संलग्न भएको भन्दै पीडितले १३ जनाविरुद्ध आपराधिक उपद्रवअन्तर्गत जाहेरी दिए लगत्तै प्रहरीले वडाध्यक्ष रामकिशोर यादव पक्राउ गरेकाे हाे ।
प्रहरीले वडाध्यक्ष यादवलाई सोधपुछका लागि बोलाएको जनाएकाे छ । त्यहीबेला उनलाई नियन्त्रणमा लिएर अनुसन्धानको लागि राखिएकाे प्रहरी उपरीक्षक अनन्तराम शर्माले जानकारी दिए ।
तोडफोड र लुटपाटमा संलग्न स्थानीय राजकुमार सिंह, प्रभास सिंह, नितेश सिंह, शैलेन्द्र सिंह, कैलाश सिंह, गणेश कामती, मुस्तफा राइनलगायतमाथि जाहेरी परेको छ । जाहेरी परेसँगै वडाध्यक्ष यादवसहित ३ जनालाई प्रहरीले पक्राउ गरिसकेको छ । अन्यको खोजी कार्य जारी रहेको प्रउ शर्माले बताए ।
स्थानीय शोभित पासवान, विन्दे पासवान, अशोक पासवान, राजकुमार पासवान र रासलाल पासवानको घर तोडफोड र लुटपाट भएको थियो ।
पीडितका अनुसार राजकुमार सिंह, प्रभाष सिंह, शैलेन्द्र सिंह, नितेश सिंह लगयत २०/२५ जनाको समूहले घर तोडफोड तथा लुटपाट गरेका थिए । मिर्चैया र सशस्त्र प्रहरीको थप टोली आएपछि उनीहरू भागेका थिए ।