इलाम । इलाममा बाढीपहिरोमा परी १७ जनाको ज्यान गएको पुष्टी भएकाे छ । इलाम नगरपालिका, सूर्योदय नगरपालिका, देउमाई नगरपालिका, माङसेबुङ गाउँपालिका र फाकफोकथुम गाउँपालिकामा बाढी पहिराेमा परेर कम्तीमा पनि १७ जनाकाे ज्यान गएकाे प्रहरीले पुष्टी गरेकाे हाे ।
प्राप्त खबर अनुसार इलाम नगरपालिका–६ घोसस्थित डम्बर बहादुर तामाङको घर पहिरोले पुरिँदा घर भित्र रहेका ६ जनाको ज्यान गएको छ । सो स्थानमा सशस्त्र प्रहरीको श्रीअन्तु गणबाट उद्धार टोली खटिएको थियो ।
यसैगरी सूर्योदय नगरपालिका–१ मानेभञ्ज्याङ्गस्थित राजु क्षेत्रीको घर पहिरोले पुर्दा ५ जनाको ज्यान गएको छ । घर भत्किएको ठाउँबाट ४ जनाको शव निकालिएको थियो भने घाइते १ जनाको अस्पताल लैजाँदै गर्दा बाटोमै ज्यान गएको हाे ।
सो स्थानमा मानेभन्ज्याङबाट सशस्त्र प्रहरी नायव निरीक्ष सुरेन्द्र डोटेलको कमाण्डमा ७ जनाको टोली खटिएको थियो ।
यसैगरी इलामको देउमाई नगरपालिका–५ घुसेनीस्थित दीपक लिम्बुको घर पहिरोले पुरिँदा २ जनाको ज्यान गएको छ भने ३ जना अझै बेपत्ता छन् । १ जनालाई सकुशल उद्धार गरिएको छ ।
यसैगरी माङसेबुङ गाउँपालिका–५ स्थित पार्टीगाउँमा मदन लिम्बुको घर पहिरोले पुरिँदा ३ जनाको ज्यान गएको छ ।
फाकफोकथुम गाउँपालिका–३ रातोमाटे बस्ने ३२ वर्षीय सुरेश लिम्बुको पनि पहिरोमा पुरिएर ज्यान गएको प्रहरीले जनाएको छ ।
तस्बिर सशस्त्र प्रहरी बल नेपाल
