काठमाडाैं । देशको पूर्वी तथा मध्य क्षेत्रमा बदली भइ केही ठाउँमा अत्यधिक र धेरै ठाउँमा मध्यम वर्षा भइरहेको छ । जल तथा मौसम विज्ञान विभागको विवरण अनुसार पछिल्लो १२ घण्टामा महोत्तरीको गौशालामा २२७ मिलिमिटर भन्दा धेरै वर्षा मापन भएको छ ।
यस्तै नवलपरासीको दुम्कौलीमा १२ घण्टामा झन्डै १३० मिलिमिटर वर्षा मापन भएको छ । अहिले मधेश, गण्डकी र लुम्बिनी प्रदेशका धेरै ठाउँमा पानी परेको छ ।
महाशाखाले यस अघि नै पूर्वानुमान गरेअनुसार आजदेखि वर्षा गराउने प्रणाली थप सक्रिय बनेको हो । यो क्रम भोलीदेखि झनै बढेर कोजाग्रत पूर्णीमासम्म देशका धेरै ठाउँमा अत्यधिक वर्षाको सम्भावना रहेको छ ।
बंगालको खाडीमा उत्पन्न वर्षा गराउने प्रणाली भारतको उडिसा हुँदै उत्तरतर्फ सरिरहेकोले भोलीदेखि वर्षा गराउने प्रणाली थप सक्रिय हुने महाशाखाले जनाएकाे छ ।
यस्तै आजदेखि सोमवारसम्म नै वर्षाको सम्भावना धेरै रहेको प्रमुख राजमार्गको बिभिन्न खण्डहरुमा मुसल्धारे वर्षा र पहिरोको सम्भावना रहेको छ ।
भोली पनि देशभर मौसम बदली भएर पहाडी क्षेत्रमा मध्यम वर्षा हुनेछ । प्रमुख राजमार्गको बिभिन्न खण्डहरुमा भोली पनि मुसल्धारे बर्षा र पहिरोको सम्भावना छ ।
पर्सी शनिवार कोशी प्रदेशका पुरै भु-भाग सहित चितवन, धादिङ, गोरखा, कास्की र लमजुङमा मुसल्धारे वर्षा र अन्यत्र पनि मध्यम वर्षा हुने छ । आइतवार बिहानैदेखि मधेश, बागमती, गण्डकी र लुम्बिनी प्रदेशमा अत्यधिक वर्षाको संभावना छ । आइतवार दिउँसोदेखि काठमाडौं उपत्यका र आसपासमा आरिघोप्टे वर्षाको संभावना रहेको छ ।
सोमवारदेखि वर्षा क्रमशः रोकिँदै मौसम खुल्दै जाने, तर लामो दूरी यात्रा अझै जोखिमपूर्ण हुने भएकोले सोमवारपछि पनि केही दिन पर्खन उचित हुने महाशाखाकाे सुझाव छ ।
यसैबीच जल तथा मौसम विज्ञान विभागले सूचना निकालेर सोमवारसम्म बागमती प्रदेशका काठमाडौं उपत्यकाका तीन जिल्ला, काभ्रे, सिन्धुपाल्चोक, रसुवा, मकवानपुर, चितवन; कोशी प्रदेशका संखुवासभा, ताप्लेजुङ, इलाम, झापा, मधेस प्रदेशका बारा, पर्सा, सर्लाही, रौतहट, मोरङ र आसपासका जिल्ला हुँदै बहने स–साना नदीमा आकस्मिक बहावको सम्भावना उच्च रहेको बताएको छ । विशेषगरी असोज १८ देखि २० गतेसम्म विशेष सतर्कता अपनाउन महाशाखाले आग्रह गरेको छ ।