काठमाडाैं । दशैंको टीकाको भोलिपल्टदेखि अतिभारी अर्थात आरिघोप्टे बर्षाको सम्भावना रहेको मौसम पूर्वानुमान् महाशाखाले जनाएकाे छ । महाशाखाले गएराति विशेष बुलेटिन निकालेर असोज १७ गते अर्थात शुक्रबारदेखि भारी हुँदै अतिभारी बर्षाको संभावना रहेको जनाएको हाे ।
मौसमबिद्हरुले भने शनिवार र आइतवारका लागि तय भएका सबै लामो दुरीका यात्रा स्थगीत गरी सुरक्षित बस्न आव्हान गरेका छन् । महाशाखाले पनि असोज १७, १८ र १९ गते पर्ने पानीले बाढी, पहिरो, डुबान, कटानका कारण हवाई तथा स्थल यातायातमा प्रभाव पार्न सक्ने सम्भावना भएकाले सतर्कता अपनाउन भनेको छ ।
यस्तो वर्षाले बाढी, पहिरो, डुबान, कटान र बालीनालीमा क्षति पुर्याउने सम्भावना उच्च रहने महाशाखाले जनाएकाे छ । असोज २१ गते मंगलबार पनि पानी पर्ने संकेत देखिएका छ । असोज २१ गतेदेखि बेलुकादेखि भने प्रणाली कमजोर हुने र राति नेपालभर पानी पर्न रोकिने संभावना रहेकाे महाशाखाले जनाएकाे छ ।
भारतले पनि जारी गर्याे माैसम पूर्वानुमान
उता भारतको मौसम बिभागले असोज १७ देखि १९ सम्म सिक्किम, पश्चिम बङगाल, बिहारमा अत्यधिक बर्षाको चेतावनी जारी गरिसकेको छ ।
महाशाखाले गएराती निकालेको दशैं विशेष बुलेटिनमा दशैंको टीकाको दिनदेखि त्रयोदशीसम्म पानी पर्ने भनेको छ ।
महाशाखाका अनुसार बंगालको खाडीमा विकसित न्यूनचापीय क्षेत्रको प्रभाव भारतको ओडिसाबाट जमिनको भू–भागमा प्रवेश गरी मध्य भारततर्फ क्रमशः सर्ने छ । त्यसले नेपालमा जलवाष्पयुक्त मनसुनी वायु प्रवेश गर्ने छ ।
नेपालमा मनसुन भित्रिने सरदर मिति जुलाई १३ र मनसुन बाहिरिने सरदर मिति अक्टुबर २ तारिख हो । यस वर्ष अक्टोबर २ तारिख अर्थात् असोज १६ गते दशैंको टीका परेको छ ।
असोज १६ गते र त्यसपछि पनि मनसुन सक्रिय हुने भएकाले नेपालबाट मनसुन बाहिरिन केही दिन ढिलाइ हुने देखिएको छ । नेपालमा यस अघि पनि मनसुन भित्रने र बाहिरिने मितीमा केही अघिपछि हुँदै आएको छ ।