गोरखा । वडा दशैंको आज नवौं दिन । नवरात्रको नवौँ दिन दशैंघर वा पूजाकोठामा नौ दुर्गामध्येकी आठौँ महागौरी देवीको विधिपूर्वक पूजाआराधना गरिँदै छ । हरेक वर्ष आश्विन शुक्ल अष्टमीका दिन महागौरी देवीको विधिपूर्वक पूजाआराधना गर्ने वैदिक सनातनी परम्परा छ । तिथि वृद्धि नभएका वर्ष नवरात्रको आठौँ दिन पर्ने भए पनि यस वर्ष चौथी तिथि वृद्धि भएकाले नवौँ दिन महागौरी देवीको पूजा परेको हो ।
आश्विन शुक्ल अष्टमीका दिन आज गोरखाको गोरखकाली र मनकामना मन्दिरमा श्रद्वालु भक्तजनहरुको भिड लागेको छ । मनकामना मन्दिरका मुल पुजारी ईन्सान बहादुर थापाका अनुसार दिउसो २ः३० बजेसम्म करिब ५ हजार श्रद्वालुले माता मनकामनाको दर्शन गरीसकेको छ ।
यस बिच करिब १५० भन्दा बढी पशुबली समेत परेको उनले बताए । उनका अनुसार आज कालरात्रीको अवसरमा राती ८ बजेतिर हटियाँबाट मालश्रीहरु आउने र गुठियाँर र थकालीहरु जम्मा भएर होम दिने प्रचलन रहेको छ ।
रालरात्रीको अवसरमा आज मनकामना मन्दिरमा आधा जुन डुबेको अवस्थामा कालो बोका बलिदिने चलन रहेको पनि उनले जानकारी दिए ।
यता गोरखा सदरमुकाममा रहेको गोरखकाली मन्दिरमा भने नियमित पुजापाठका साथै राँगाको बली दिने चलन रहेको मुल पुजारी सारदा प्रसाद भट्टराईले जानकारी दिए ।
उनका अनुसार बिगतमा आजको दिनमा ३३ वटा राँगाको बली दिने गरेकोमा सरकारले बजेट कटौती गरेसंगै ५ वटा राँगा र बाकी २८ वटा भने कुभिण्डो र केराको बली दिने गरिएको छ ।
गोरखकाली मन्दिरमा पनि दिउसो २ः३० बजेसम्म करिब ५ हजार श्रद्वालुले गोरखाकाली माताको दर्शन गरीसकेको उनले जानकारी दिए । त्यती बेलासम्म बोला बलीकोलागि ३०० भन्दाबढी कुपन बितरण गरिएको छ । आजै चण्डीको १३औं अध्यायको हवन गरिएको छ ।
मुल पुजारी भट्टराईका अनुसार कालरात्रीको अवसरमा आज राती ११ बजे पछी गरिने छ । कालरात्री सकिए लगत्तै अष्टमी पुजामा भेडाको वली दिएर आजको पुजा समापन हुने गर्दछ ।
नवरात्रका अवसरमा देवीको आराधना गरी पूजा गरेमा शक्ति, ऐश्वर्य र विद्या प्राप्त हुने धार्मिक विश्वास छ । यसै आधारमा वैदिक सनातन धर्मावलम्बीले प्रत्येक वर्ष आश्विन शुक्ल प्रतिपदादेखि नवमीसम्म दुर्गा देवीको विशेष आराधना गर्छन् । नौ दिनसम्म पूजाआराधना गरेको प्रसाद विजयादशमीदेखि कोजाग्रत पूर्णिमाका दिनसम्म लगाइन्छ ।
फाेटाे : अमित भट्ट