काठमाडौं। नवघोषित कुमारी आर्यतारा शाक्यले आज आसन ग्रहण गरेकी छिन् । आर्यतारालाई आज दिउँसो १२:०५ बजेदेखि १२:१६ बजे बीचको साइतमा कुमारीको आसन ग्रहण गराएकाे हाे ।
त्यससँगै पुरानो कुमारी तृष्णा शाक्यलाई बाजागाजासहित बिदाइ गरिएकाे छ ।
काठमाडौं इटुम्बहालकी आर्यतारा शाक्यलाई नयाँ कुमारीका रूपमा छनोट गरिएको हो । कुमारी छनोटको विधिअनुसार गुठी संस्थान, पञ्चांग निर्णायक समिति र सरोकार भएका पक्षसँगको सल्लाह तथा परामर्शपछि आर्यतारालाई नयाँ कुमारी छनोट गरिएको थियो ।
स्थानीय इटुम्बहालकी २ वर्षीया ६ महिनाकी कुमारीलाई आज विधि विधानपूर्वक कुमारीघरमा आसन ग्रहण गराएको छ ।
विशेष बाजागाजासहित आसन गराएपछि तलेजु भवानीको दर्शनका गराइ मन्दिरमा यात्रा गराइएकाे कुमारीघर व्यवस्थापन समितिका संयोजक गौतम शाक्यले जानकारी दिए ।
उनका अनुसार जीवित देवीका रूपमा पूजाआजा गरिने कुमारीलाई महालक्ष्मीको प्रतीकसमेत मानिएको छ । तत्कालीन राजा जयप्रकाश मल्लले कुमारीलाई स्थापना गरेको बताइन्छ ।
कोजाग्रत पूर्णिमाका दिन राष्ट्रप्रमुखले पनि कुमारीको दर्शन गर्ने परम्परा छ ।