गोरखा । जिल्ला प्रशासन कार्यालय गोरखाले हालै देशभरका विभिन्न जिल्लामा देखिएको असामान्य सुरक्षाजन्य घटनाक्रमलाई मध्यनजर गर्दै सर्वसाधारणलाई सतर्कता अपनाउन आग्रह गरेको छ ।
भदौ २३ र २४ गतेको आन्दोलनको क्रममा सुरक्षाकर्मीबाट हतियार र अन्य बन्दोबस्ती सामग्री लुटिएको घटना र केही कैदी तथा थुनुवा फरार भएको भएकाले पनि प्रशासनले आवश्यक सजगता अपाउन आग्रह गरेको हो ।
प्रसासनले जारी सूचनामा भनिएको छ, “देशका विभिन्न जिल्लाका कारागारबाट केही कैदी तथा थुनुवा भागेको अवस्थामा छन् । उनीहरू विभिन्न स्थानमा लुकेर आपराधिक गतिविधि गर्न सक्ने सम्भावना रहेकोले गोरखा जिल्लावासी सबै नागरिकलाई सतर्क रहन अनुरोध छ ।”
जिल्ला प्रसासन कार्यालय गोरखाका साहायक प्रमुख जिल्ला अधिकारी चित्राङ्गत बरालका अनुसार कारागारबाट भागेका कैदीहरू हतियारसहित फरार भएको हुनाले कुनै पनि आपराधिक घटना हुनसक्ने जोखिम कायम छ ।
गोरखा प्रशासनले हतियार र बन्दोबस्ती सामग्रीसमेत लुटिएको अवस्थाले थप चुनौती सिर्जना गरेको उल्लेख गर्दै, शंकास्पद गतिविधि वा व्यक्तिको हकमा तत्काल जानकारी दिन सर्वसाधारणलाई आग्रह गरेको छ ।
फरार कैदी वा उनीहरूलाई सहयोग गर्ने व्यक्तिबारे थाहा पाएमा नजिकको प्रहरी कार्यालयमा सम्पर्क राख्न वा १०० नम्बरमा फोन गरेर जानकारी प्रसासनले भनेको छ ।
प्रशासनले समुदाय स्तरमा स्वयं सतर्कता बढाउन, अपरिचित व्यक्तिहरूलाई पहिचान गर्न, र आवश्यकता अनुसार प्रहरीलाई सहयोग पु¥याउन अपिल गरेको छ ।
साथै, कुनै पनि अफवाहमा नफस्न, आधिकारिक सूचनामात्रलाई विश्वास गर्न र सामाजिक सञ्जालमा अपुष्ट समाचार नफैलाउन पनि अनुरोध गरेको छ ।
सुरक्षा निकायले गोरखाका बासिन्दालाई सम्भावित आपराधिक गतिविधिबाट सजग रहन, आवतजावतमा सावधानी अपनाउन विशेष अनुरोध गरेको हो ।
