गोरखा । गोरखाको पालुङटार नगरपालिकाले ‘ईनर्जी ड्रिंक रेडबुल’ बिक्रीमा प्रतिबन्ध लगाएको छ ।
करछली गरि अवैध रुपमा आउने गरेको भन्दै ‘ईनर्जी ड्रिंक रेडबुल’लाई पालिकाले बिक्री बितरणमा रोक लगाएको हो ।
उक्त ड्रिंक माथी रोक लगाउनु पूर्व असोज १० गते शुक्रबार नगरपालिकामा उपभोत्ता हित संरक्षण समितिको बैठकले बिक्री बितरणमा रोक लगाउने निर्णय गरेको पालिकाका प्रमुख प्रशासकीय अधिकृत शेरबहादुर बिसीले बताए ।
जिल्ला प्रहरी कार्यालय गोरखा र ईलाका प्रहरी कार्यालय ठाँटापोखरीलाई समेत पत्राचार गरेर निर्णय कार्यान्वयमा आवश्यक सहयोग गरिदिन आग्रह गरेको छ ।
पालिकाले बैठकको निर्णय कार्यान्वयकालागि सहयोग माग्दै जिल्ला प्रशासन कार्यालयलाई पत्राचार गरेको छ ।
बैठकले नगरपालिकाको इजाजत बिना पोके ब्यापारीहरुलाई पालिका भित्र कुनैपनि मालसामान बिक्री बितरण गर्न समेत रोक लगाएको छ ।
सोही बैठकले सुभम् बेकरी पोखराको नक्कली ध्यूलाई समेत बिक्री बितरणमा रोक लगाएको छ । उक्त ध्यू सबै नियन्त्रणमा लिएर खाद्य प्रयोगशालामा अनुसन्धानकोलागि पठाएको र प्रतिवेदन नआउदासम्म रोक लगाउको प्रमुख प्रशासकीय अधिकृत बिसीले जानकारी दिए ।
उक्त कम्पनीबाट उत्पादित ध्यू को बिक्री मूल्य ३९० लेखिएको भएतापनि माथीबाट स्टिकर टाँसेर २८० रुपैयाँ मूल्य निर्धारण गरी बिक्री गर्दा जम्मा ९० रुपैयाँमा हुने गरेको भेटिए लगत्तै सबै ध्यू नियन्त्रणमा लिएको छ ।
जिल्ला अनुगमन समितिले समेत उक्त ध्यू उत्पादक कम्पनीलाई पत्राचार गरेर तत्कालै जिल्ला प्रशासन कार्यालयमा उपस्थित हुन भनेको सहायक प्रमुख जिल्ला अधिकारी चित्राङ्गत बरालले जानकारी दिए ।
उनका अनुसार ध्यूमा कैफियत देखिएपछी गोरखा जिल्ला भित्र भएका सबै ध्यू नियन्त्रणकालागि प्रहरी प्रशासनलाई भनिएको छ ।