मुग्लिन । मुग्लिन–नारायणगढ सडक खण्डको तुइन खोला नजिकै खसेको सुख्खा पहिरो पन्छाउन सुरू गरिएको छ ।बिहान ७ बजेदेखि ४ वटा मेसिन प्रयोग गरेर काम थालिएको पत्रकार बिनाेद श्रेष्ठले बताए ।
पहिरो ठूलो भएकाले पन्छाउन दिनभर जसाे लाग्ने अनुमान गरिएकाे उनले जानकारी दिएका छन् । कामकाे प्रकृती हेरेर थप पहिराे नगएकाे खण्डमा साँझसम्म यातायात सुचारु हुने उनले बताए ।
पहिरोले सडक बन्द हुँदा यात्रु र चालकलाई वैकल्पिक सडक प्रयोग गर्न सडक डिभिजन कार्यालय भरतपुर, चितवनले अनुरोध गरेको छ ।
तुइन खोला पुल नजिकै हिजो पुन: ठूलो पहिरो खसेपछि आवतजावत पूर्णरूपमा बन्द छ । हिजोमात्रै उक्त स्थान २ पटक ठूला सुख्खा पहिराे गएकाे थियाे ।
वैकल्पिक सडकका रूपमा महोत्तरीको बर्दिवास, मकवानपुरको हेटौंडा, रुपन्देहीको बुटवल, नवलपरासी बर्दघाट सुस्ता पूर्वको कावासोती र गैंडाकोट, धादिङको नौबिसे तथा तनहुँको हकमा खैरेनीटारबाट वैकल्पिक मार्ग प्रयोग गर्न चितवन प्रशासनले अनुरोध गरेको हो ।
चितवनबाट काठमाडाैं आउजाउ गर्नका लागि (साना गाडी मात्रै) चितवनको जुटपानी, शक्तिखोर, मायाटार हुँदै धादिङको मलेखु निस्कने वैकल्पिक सडक प्रयोग गर्न सकिनेछ ।
त्यस्तै धादिङको नौबिसेबाट मकवानपुरको हेटौंडा निस्कने त्रिभुवन राजपथको बाटोलाई वैकल्पिक सडकको रूपमा प्रयोग गर्न सकिने प्रशासनले जनाएको छ । यस्तै मकवानपुरको हेटौंडाबाट भैंसे, भीमफेदी, कुलेखानी, सिस्नेरी हुँदै दक्षिणकालीको बाटो भएर काठमाडाैं पुग्न सकिन्छ ।
हेटौंडा–काठमाण्डौ आउजाउ (ठूला गाडी मात्र) का लागि कान्ति लोकपथ प्रयोग गर्न सकिनेछ । चितवनबाट पोखरा जानका लागि ठूला तथा साना दुवै गाडीले बुटवल हुँदै पोखरा जान सक्नेछन् । यसैगरी चितवनबाट कालीगण्डकी करिडोरको बाटो (सानो गाडी मात्रै) गैंडाकोट भिमाद हुँदै तनहुँ निस्कन सकिनेछ ।
मुग्लिन–नारायणगढ सडकखण्डअन्तर्गत तुइनखोलामा पहिरो खस्दा गएकाे शुक्रबारदेखी दैनिकजसो यात्रु र चालकले सास्ती भोगिरहेका छन् ।