मुग्लिन । मुग्लिन-नारायणगढ सडकखण्ड आज दिउँसो २ घण्टाकाे लागि बन्द गरिएको छ । तुइन खोला पुल नजिक खसेको पहिरो सबै पन्छाउनका लागि सडक बन्द गर्न लागिएको हो ।
आज दिउँसो १ बजेदेखि ३ बजेसम्म सडक बन्द गरेर बाँकी पहिरो पन्छाउने काम हुन लागेकाे सडक डिभिजन कार्यालय भरतपुरले जनाएको छ ।
तुइन खोला पुलनेर खसेको पहिरोका कारण गत शुक्रबार साँझ ७:१५ बजेदेखि करिब ४६ घण्टासम्म सडक अवरुद्ध हुँदा यात्रुहरु अलपत्र परेका थिए । आइतबार अपराह्न ४:३० बजेतिर सडक एकतर्फी खुलाइएको थियो । राति यात्रा गर्दा जोखिम हुने भएकाले आइतबार राति ९ बजेदेखि सोमबार बिहान ५ बजेसम्म पुन: सडक बन्द गरिएको थियो ।
आज बिहानसम्म पनि तुइन खोला पुल नजिकै मात्र सडक एकतर्फी सञ्चालनमा छ भने अन्य स्थानमा दुईतर्फी गाडी चलिरहेका छन् । दशैं मनाउन घर फर्किने क्रम अब बढ्ने भएकाले बाँकी पहिरो पनि पन्छाएर दुईतर्फी नै सडक सञ्चालन गर्ने तयारी गरिएको हो ।