काठमाडौं । मुग्लिन–नारायणगढ सडक खण्ड खुल्ने अनिश्चित भए लगत्तै टिकट काट्न बन्द गरिएको छ । मुग्लिन बजार नजिकै रहेकाे तुइन खोला क्षेत्रमा ठूलाे पहिराे गएर पन्छाउन समस्या भएपछी टिकट काट्न बन्द गरिएकाे हाे ।
नेपाल यातायात व्यवसायी राष्ट्रिय महासङ्घका वरिष्ठ उपाध्यक्ष सरोज सिटौलाले बाटोको अवस्था अनिश्चित रहेकोले यात्रुहरूलाई ठुलो जोखिममा नपर्न ब्यवसायीहरुलाई आग्रह गरेका छन् ।
उनका अनुसार मुग्लिन–नारायणगढ सडक खण्ड अवरुद्ध हुदा ३ दिनदेखि हजारौं गाडीहरू सडकमा अलपत्र अवस्थामा रोकिएका छन् । शनिबार र आईतबार मात्रै २० हजारभन्दा बढी यात्रुले टिकट लिएर अलपत्र परेका छन् ।
उनले अग्रिम टिकटको बिक्री तत्कालका लागि रोकिएको र अहिलेको अवस्थामा थप टिकट दिन नसकिने समेत स्पष्ट पारे ।
सडक डिभिजन कार्यालय भरतपुरले सडक अझै अवरुद्ध नै रहेकोले वैकल्पिक मार्ग प्रयोग गरी यात्रा गर्नु अनुरोध गरेको छ । नौबिसे–दामन–हेटौडा र मुग्लिन–भिमाद–डेढगाउँ–गैँडाकोट (कालीगण्डकी करिडोर) हुँदै यात्रा गर्न आग्रह गरिएको हो ।
