मुग्लिन । मुग्लिन–नारायणगढ सडक बिहानैदेखी खुलाउने प्रयास सुरु गरिएकाे छ । शुक्रवार बेलुकी ७:१५ बजेदेखी अवरुद्ध भएको सडक खुलाउन बिहानैदेखी मेशिनहरु प्रयाेग गरिएकाे छ ।
मुग्लिन बजार नजिकै पर्ने तुईन खोलामा पहाड काटेको ठाउँमा पहिरो खसेर सडक अवरुद्ध भएको हो ।
शनिबार पहिराे पन्छाउने प्रयास असफल भएकाे थियाे । शनिबार बिहान पनि अर्को ठूलो पहिरो खसेका कारण सडक सुचारु गर्ने प्रयास असफल भएकाे सडक डिभिजन कार्यालय भरतपुरले जनाएको छ ।
सडक सुचारु गर्न नसक्दा शुक्रबार बेलुकीदेखि नै सवारी साधन र यात्रु सडकमै अलपत्र अवस्थामा छन् । गन्तव्यमा हिँडेका हजाराैं यात्रु २ रातसम्म सडकमै अलपत्र परेका छन् । उनीहरुलाई शनिबार ईच्छा कामना जेसिजकाे समन्वयमा दिउसाे पानी र खाजाकाे ब्यवस्था गरेकाे थियाे ।
सडक डिभिजन कार्यालय भरतपुरले सकेसम्म वैकल्पिक बाटोको प्रयोग गर्न र लेन अनुशासन पालना गर्न आग्रह गरेको छ । कार्यालयका अनुसार मुग्लिन सडकको विकल्पमा नौबिसे–दामन–हेटौंडा र कालिगण्डकी करिडोरको मुग्लिन–भिमाद–डेढगाउँ–गैंडाकोट सडक प्रयोग गर्न सकिनेछ ।
बिना राेकावट काम गर्न पाए दिउसाेसम्म सडक सुचारु गर्न सकिने सडक डिभिजन कार्यालय भरतपुरले जनाएको छ ।