मुग्लिन । मुग्लिन–नारायणगढ सडक १८ घण्टाभन्दा बढी समयदेखि पूर्ण रुपमा अबरुद्ध भएकाे छ ।
शुक्रबार साँज ७:१५ बजेतिर चितवनको इच्छाकामना गाउँपालिका–६ मा पर्ने तुइन खोलामा खसेको पहिरोले सडक अवरुद्ध भएको हो ।
सडक माथिकाे पहाडबाट ढुङ्गासहितको पहिरो झर्ने क्रम अझै जारी छ । पहिरो पन्छाउनकाेलागि सबै उपकरण तयारी अवस्थामा रहेको भएता पनि सुरक्षालाई ध्यानमा राखेर तत्काल मेसिन प्रयाेग गर्न नसकिएकाे सडक डिभिजन कार्यालय भरतपुर चितवनले जनाएको छ ।
सुरक्षा जोखिमका कारण गएराति पनि काम हुन सकेको थिएन । मुग्लिन प्रहरीका अनुसार पहिराे राेकिएकाे खण्डमा सडक खुलाउन आज दिनैभर जस्ताे समय लाग्ने अनुमान गरिएकाे छ । सडक अवरुद्ध हुँदा मुग्लिन बजार अस्त ब्यस्त भएकाे छ भने गन्तव्यमा हिँडेका यात्रु र सवारी बीचबाटोमै अलपत्र परेकाे छ ।
प्रहरी र सडक कार्यालयले सवारीलाई वैकल्पिक सडक प्रयोग गर्न आग्रह गरिएको छ । विकल्पमा पूर्वबाट आउने साना गाडीले हेटौँडा–कुलेखानी र पश्चिमबाट आउने गाडीले कालिगण्डकी करिडोरको सडक अवस्था हेरेर प्रयोग गर्न सक्ने सडक डिभिजन कार्यालय भरतपुरका ईन्जिनियर कृष्णप्रसाद आचार्यले बताए ।