काठमाडाैं । जेनजी आन्दोलनले सबै आन्दोलनकारीहरूलाई घर फर्कन आह्वान गरेको छ । सोमबार बानेश्वरमा जारी प्रदर्शनमा घुसपैठ भएको भन्दै सबैलाई फर्कन आह्वान गरेको हो ।
प्रदर्शनको व्यवस्थापनमा सहभागी जेनजी प्रतिनिधि प्रदीप ज्ञवालीका अनुसार जेन डट जेटनेपालमा नामको इन्स्टाग्राम अकाउन्टमा एउटा सूचना जारी गरी प्रदर्शनमा सहभागी सबैलाई फर्कन भनिएको जानकारी दिए ।
बिहान ९ बजेदेखि माइतीघरमा जम्मा भएका युवाहरू ११ बजेपछि बानेश्वर पुगेका थिए । बानेश्वरमा पुगेपछि प्रदर्शन उग्र बनेपछि प्रहरीले पानीको फोहोरा र अश्रुग्यास प्रहार गरेको थियो ।
बानेश्वरस्थित संसद भवन परिसरमा पनि प्रदर्शनकारीहरू प्रवेश गरेका थिए । त्यहाँ रहेका सुरक्षाकर्मीहरूले उनीहरूलाई बाहिर निकालेका थिए ।