गोरखा । उत्तरी गोरखाको ल्होमा रहेको २ घरमा आज बिहान आगलागी भएको छ । आगलागीबाट घर जलेर पूर्ण रुपमा नष्ट भएको गोररखा प्रहरीले जनाएको छ ।
जिल्ला प्रहरी कार्यालय गोरखाले दिएको जानकारी अनुसार बिहान १ बजेको समयमा आगलागी हुदा चुमनुब्री गाउँपालिका–२ ल्हो, स्योका स्थानिय पेम्बा छिरिङ्ग लामा र लाक्पा नुर्बु लामाको घर जलेर नष्ट भएको हो ।
आगलागीबाट के कती क्षती भएको छ भन्ने बारे प्रहरीले विवरण संकलन गरिरहेको छ ।
ढुङ्गा, माटो र काठले बनेको २ तले टिनले छाएको कच्ची घरमा आगोलागी भएको भन्नेबारे प्रहरीलाई स्थानियले खबर गरेको थियो ।
घटना लगत्तै इलाका प्रहरी कार्यालय लार्केबाट प्रहरी टोली खटि गएको थियो । अहिले आगो पुर्ण नियन्त्रणमा आइसकेको छ ।
प्रहरीले आगलागी कसरी भयो भन्नेबारे अनुसन्धान सुरु गरेको जनाएको छ । दुवै घरमा घरधनीले अहिले आफन्तको घरमा आश्रय लिएको प्रहरीले जनाएको छ ।
