काठमाडौं । आज भएको राष्ट्रपति निर्वाचनमा रामचन्द्र पौडेल बिजयी भएका छन् । पौडेल ८ दलिय गठबन्धनबाट उम्मेदवार भएका थिए भने एमालेबाट पूर्व सभामुख सुवास नेवाङले उम्मेदवारी दिएका थिए ।
राष्ट्रपतिमा विजयी भए लगत्तै पूर्वप्रधानमन्त्री एवम् नेपाली कांग्रेसका सभापति शेरबहादुर देउवाले पौडेललाई बधाई दिएका थिए । निर्वाचनको परिणाम सार्वजनिक भएलगतै देउवाले सामाजिक सञ्जालमार्फत पौडेललाई बधाई दिएका हुन् ।
उनले भनेका छन्, ‘राष्ट्रपतिमा निर्वाचित हुनुभएकोमा मेरा मित्र रामचन्द्र पौडेलजीलाई हार्दिक बधाई तथा सफल कार्यकालको शुभकामना ।’
नेपालको तेस्रो राष्ट्रपतिमा पौडेल विजयी भएका हुन् । बिहीबार भएको निर्वाचनमा कांग्रेसका उम्मेदवार पौडेलले एमालेबाट उम्मेदवार बनेका सुवासचन्द्र नेम्वाङलाई पराजित गरेका हुन् ।
निर्वाचन आयोगका अनुसार कूल ८८२ मतदातामध्ये ८३१ मतदाताले निर्वाचनमा मतदान गरेका थिए । ३३२ संघीय संसदका सदस्यहरुमध्ये ३१३ जना र ५५० प्रदेश सभा सदस्यहरुमध्ये ५१८ जनाले मतदान गरेका हुन् । राष्ट्रपतिको निर्वाचनमा राप्रपा, नेमकिपाका सांसदले मतदान गरेनन् ।
राष्ट्रपतिमा निर्वाचित सत्ता गठबन्धनको उम्मेदवार रामचन्द्र पौडेलले ५६६ मत ल्याए भने एमालेका सुवास नेम्वाङले २६० मत ल्याएका थिए ।
पौडेलले प्रदेशमा ३५२ र संघमा २१४ ल्याउँदा नेम्वाङले प्रदेश १६२ र संघ ९८ मत ल्याएका थिए । निर्वाचनमा संघीय सांसदको मतभार ७९ र प्रदेशसभा सदस्यको मतभार ४८ हुन्छ ।
