गोरखा । नेत्रविक्रम चन्द विप्लव नेतृत्वको नेकपाले आयोजना गरेको नेपाल बन्दको प्रभाव गोरखाको सडकमा देखा परेको छ । ठुला सार्वजनिक तथा निजी सवारी साधनहरु चलेका छैनन भने कलेज तथा स्कुल बस समेत सञ्चालन गरिएको छैन ।
बन्दका कारण जिल्ला सदरमुकाम हुदै ग्रामिण क्षेत्र तथा जिल्ला बाहिर जाने सयौं सवारी पार्किङमा राखिएको छ भने ग्रामिण क्षेत्रबाट आउने तथा जिल्ला बाहिरबाट आउने कुनै पनि सवारी साधान आएको छैन ।
बन्दले गोरखा बजार सहित ठुला बजारहरु छेवेटार, आरुघाट, भच्चेक जस्ता बजार समेत बन्द भएका छन् । भने भित्री गल्लीका केही पसलहरु भने खुल्ला गरिएको छ ।
बन्दका बिच सञ्चारकर्मी, एम्बुलेन्स, सुरक्षा निकायका सवारी र केही निजि मोटरसाइकल मात्र चलेका छन् ।
यता सुरक्षाका लागि भन्दै ठुलो संख्यामा सशत्र प्रहरी परिचालन गरिएको छ । उज्यालो भए संगै थोरै संख्यामा नेपाल प्रहरी र ठुलो संख्यामा सशत्र प्रहरी चोक तथा गल्लीहरुमा गस्ती गरिहेका छन् ।
तत्कालीन केपी शर्मा ओली नेतृत्वको सरकारले विप्लव नेतृत्वको नेकपासँग गरेको ३ बुँदे सहमति कार्यान्वयन नगरेर उल्टै आफ्ना नेता तथा कार्यकर्तालाई पक्राउ पूर्जी जारी गरेको, एमसीसी, महंगी र राष्ट्रघाती सन्धी सम्झौताविरुद्ध विप्लव नेतृत्वको नेकपासहितका ४ दलले बन्दको आव्हान गरेका हुन् ।
जसमा नेकपासँगै ऋषि कट्टेल नेतृत्वको नेपाल कम्युनिष्ट पार्टी, आहुति नेतृत्वको वैज्ञानिक समाजवादी कम्युनिष्ट पार्टी र कर्णजित बुढाथोकी नेतृत्वको नेकपा माओवादी समाजवादी रहेका छन् ।
