गोरखा । गोरखाको ११ वटै स्थानिय तहले नीति तथा कार्यक्रम सार्वजनिक गर्ने काम सम्पन्न गरेको छ । ११ वटै स्थानिय तह मध्ये अजिरकोट गाउँपालिकाले असार ५ गते गाउँ सभा सम्पन्न गरेको हो । अजिरकोटले जिल्लामा सबै भन्दा पहिला नीति तथा कार्यक्रम सार्वजनिक गरेको थियो ।
त्यस लगत्तै शहीदलखन गाउँपालिकाले असार ५ गते र पालुङटार नगरपालिकाले असार ९ गते नीति तथा कार्यक्रम सार्वजनिक गरेको हो ।
बाँकी रहेका मध्ये गोरखा नगरपालिका, भीमसेन थापा गाउँपालिका, आरुघाट गाउँपालिका, बारपाक सुलिकोट गाउँपालिका, सिरानचोक गाउँपालिका, गण्डकी गाउँपालिका, धार्चे गाउँपालिका र चुमनुब्री गाउँपालिकाले भने असार १० गते नीति तथा कार्यक्रम सार्वजनिक गरेका छन् ।
नीति कार्यक्रमसहित गाउँसभा छ गते गरेको शहीदलखन गाउँपालिकाले शुक्रबार बजेट अधिवेशन गरेको छ । शहीदलखन गाउँपालिकाले योजनागत बजेट बिनियोजन गरेको छ भने अन्य पालिकाले एकमुष्ट आय ब्याय बिवरण मात्रै सभामा पेश गरेका छन् ।
स्थानीय सरकारले असार १० गतेभित्र बजेट, नीति तथा कार्यक्रम ल्याउनुपर्ने कानुनी ब्यवस्था गरेकाले जिल्लाको सबै स्थानीय तहले २०७९÷०८० को नीति तथा कार्यक्रम सार्वजनिक गरेका हुन् ।
अन्तर सरकारी वित्त ब्यवस्थापन ऐन २०७४ को परिच्छेद ७ को दफा २१ को उपदफा ३ मा गाउँ कार्यपालिका र नगर कार्यपालिकाले प्रत्येक वर्ष असार महिनाको १० गतेभित्र आगामि वर्षका राजस्व र आय ब्यायको अनुमान गाउँ तथा नगरसभामा पेश गर्नुपर्ने प्रावधान गरेको छ ।
