गोरखा । स्थानिय चुनाव नजिकीदै गर्दा सदरमुकाममा रहेको गोरखा नगरपालिकाको मेयर र उपमेयरमा नेपाली काँग्रेसका आकांक्षीहरुको भिड नै लागेको छ । प्राप्त विवरण अनुसार मेयरमा १० जना र उपमेयरमा ७ जना गरी १७ जनाले उक्त पदका लागि दावी गरेका छन् ।
मेयर पदका लागि हाल भएका राजनराज पन्त सहित जिल्ला उप–सभापति इमानसिंह बस्नेत, जिल्ला सचिव किशोरजंग थापालेको समेत दावी परेको नगर सभापती चन्दनबावु खत्रीले जानकारी दिए । दावी गर्ने सबैले उम्मेदवारीको फारम पेश गरेको पनि सपभाती खत्रीले जानकारी दिए ।
गएको स्थानिय निर्वाचनमा नगरपालिकाको उप–मेयर पद जितेकी बिनाकुमारी श्रेष्ठले पनि मेयर पदका लागि दावी गरेकी छिन् । त्यस्तै गरी, गण्डकी प्रदेश सदस्य शोभा अधिकारी, महाधिवेशन प्रतिनिधि पूर्णबहादुर पन्त (ध्रुब), जिल्ला सदस्य विश्वदेव श्रेष्ठ, गोरखा नगरपालिका वडा नम्बर १२ का वडा अध्यक्ष डिलबहादुर थापा, कांग्रेसका जिल्ला कार्य समितिका पूर्व कोषाध्यक्ष भुगोल थापा, गोरखा नगर कार्यपालिका सदस्य हरि गान्धारीले पनि मेयर पदलका लागि दावीपत्र पेश गरेका छन् ।
काँग्रेसको तर्फबाट नगरपालिकाको उप–मेयरका लागि गोरखा नगरपालिका ६ कालिमाटी निवासी मिनादेवी श्रेष्ठ, हस्पिटल लाइन निवासी पुष्पा श्रेष्ठ, शक्तिचोक निवासी शरद श्रेष्ठका साथै गोमा दवाडी, मसलिमाया थोकर, पम्फा गान्धारी र रिता परियारले पनि दावी गरेका छन् ।
उम्मेदवारीका लागि नगर समितिमा परेका आवेदकहरु मध्ये १–१ जनालाई सर्वसम्मत बनाउन प्रयास गरिने तर मिल्न नसकेको खण्डमा सबै जनाको नाम सिफारीस गरेर जिल्लामा पठाउने नगर सभापती खत्रीले जानकारी दिए ।
