गोरखा । गोरखा बजार क्षेत्रमा तौलमा ठगी गरेको भन्दै गोरखा प्रहरीले २ जनालाई नियन्त्रणमा लिएको छ । पक्राउ पर्नेमा पर्सा जिल्ला पर्सागढी नगरपालिका २ बस्ने ३७ बर्षिय नरेश ओझैया र ४१ बर्षका देवेन्द्र खवासलाई गोरखा प्रहरीले नियन्त्रणमा लिएको हो ।
उनीहरुले गोरखा सदरमुकामको लक्ष्मी बजार क्षेत्रमा कुखुरा लिन आउदा तौलमा तलमाथी गरेर कुखुरा किसानलाई ठगी गर्दै आएको विशेष सूचनाको आधारमा जिल्ला प्रहरी कार्यालय गोरखाबाट खटिएको प्रहरीले टोलीले उनीहरुलाई नियन्त्रणमा लिएको प्रहरी उपरिक्षक केदार खनालले बताए ।
बोइल कुखुरा लिन आएका उनीहरुले आफैले ल्याएको तौल मेशिनमा गुप्त रुपमा राखिएको चिप्स मार्फत आफुले लुकाएको रिमोट कन्ट्रोल मार्फत तौलमा तलमाथी गर्ने गरेको पिडित किसान गोरखा नगरपालिका ९ लल्मी बजारका राजाराम कुँवरले बताए । ‘प्राय कुखुरा लिन आइरहने उनीहरुले आफैले ल्याएको तौल मेसिन खल्तीमा रहेको रिमोट मार्फत तौल घटाउदो रहेछ । हामीले त अहिलेसम्म विश्वास गरेर कुखुरा दिदै आएका थियौ तर शंका लागेर खनतलासी गर्दा खोल्तीमा रिमोट कन्ट्रोल फेला परे पछी नियन्त्रणमा लिएर प्रहरीलाई बुझाएका हौं’ किसान कुँवरले भने ।
उत्त क्षेत्रमा यस भन्दा अगाडी पनि उनीहरुले किसानलाई ठग्दै आएको अनुसन्धानका क्रममा बुझन आएको भन्दै एउटा बोलेरोमा कम्तीमा पनि ५० हजार रुपैयाँ बरावर किसान ठगीदै आएको प्रहरी उपरिक्षक खनालले जानकारी दिए ।
काठमाण्डौंमा रहेको श्याम महर्जनको आर.के.कोल्ड स्टोरका लागि कुखुरा लिन आएका ओझैया र खवासलाई डिजिटल तराजु सहित प्रहरीले नियन्त्रणमा लिएर सार्वजनिक मुद्वा दर्ता गर्ने तयारी गरेको जिल्ला प्रहरी कार्यालयले जानकारी दिएको छ ।
कारवाहीका लागि नापतौल विभागमा पठाउने तयारी गर्दा मानिस नपठाउनु भन्ने जानकारी आएकोले किसानको केही क्षतिपुर्ती आउने आशामा सार्वजनिक मुद्वा दर्ता गर्न लागिएको जिल्ला प्रहरी कार्यालयका प्रहरी निरिक्षक तथा सूचना अधिकारी हिमनाथ घिमिरेले जानकारी दिए ।
ठगीमा प्रयोग गर्दै आएको डिजिटल तराजु भने नापतौल विभाग काठमाण्डौं पठाउने तयारी भइरहेको जिल्ला प्रहरी कार्यालयले जनाएको छ ।
