गोरखा । सरोकारवाला निकायको बेवास्तै पछी गोरखाको ट्राफिक प्रहरी आफै सडकमा परेको प्वाट टाल्दै हिड्न थालेका छन् । सवारी दुर्घटना हुन सक्ने भन्दै जिल्ला ट्राफिक प्रहरी कार्यालयले मुख्य सडकको खाडल पुर्न सुरु गरेको हो ।
पहिलो चरणमा बिहीबार गोरखा अस्पताल जाने मार्गमा बनेको ठुलो खाड्ल पुरेको जिल्ला ट्राफिक प्रहरी कार्यालय गोरखाले जानकारी दिएको छ । ‘सडक कार्यालय र नगरपालिकाले वास्तै गरेन । दुर्घटना हुने डरले सबैको सहयोगमा सडक पुर्न सुरु गरिएको’ जिल्ला ट्राफिक प्रहरी कार्यालयमा प्रमुख प्रहरी सहायक निरिक्षक भूमीराज घिमीरेले बताए ।
खाडल पुर्नकालागी गिटी, बालुवा र सिमेन्ट सहयोग मागिएको र ट्राफिक प्रहरी कर्मचारीहरु मिलेर सडकमा ढलान गरिएको कार्यालयले जनाएको छ । ‘हामीले गिटी धनी संग गिटी र बालुवा धनी संग बालुवा माग्यौ । स्थानिय हार्डवयर संग सिमेन्ट मागेर सडकमा भएको खाडल पुर्न सुरु गरेका हौ’ भन्छन् प्रमुख घिमीरे ।
आँबुखैरेनीदेखी गोरखा बजार सम्मका मुख्य मुख्य सडक र केही सहायक सडकमा ठुल–ठुला खाडल परेको र स्थानिय तथा सरोकारवाला कुनै पनि निकायले मर्मतमा चासो नदेखाए पछी कार्यालयले नै सबै संग सहयोग मागेर मर्मतको काम थालनी गरेको हो ।
अबको केही दिन भित्रै गोरखा बजारको खोलखोले, बाह्र किलो बजार अबुवा बजार क्षेत्रमा सडक मर्मतको काम थाल्ने कार्यालयले जानकारी दिएको छ ।
