गोरखा । गोरखाको आरुघाटबाट ज्यान मार्ने उद्योग गरेको आरोपमा १ जना भारतिय नागरिकलाई गोरखा प्रहरीले पक्राउ गरेको छ ।
पक्राउ पर्नेमा आरुघाट गाउँपालिका ९ को आरुघाट बजारमा घर निर्माणको काम गर्दै आएका भारत मोतिहारी जिल्ला पूर्वी चम्पारण २५ रक्सौल घर भएका २७ बर्षिय दिपान्सुकुमार शाहलाई गोरखा प्रहरीले नियन्त्रणमा लिएको हो ।
पक्राउ परेको शाहले आरुघाट गाउँपालिका ९ आरुघाट बजारमा खाजा–नास्ता पसल सञ्चालन गर्दै आएकी २७ बर्षिया शर्मिला गुरुङ र निजकी छोरी ६ बर्षिया रोशिला गुरुङलाई सुतिरहेको अवस्थामा मादक पदार्थ सेवन गरी निर्घात कुटपिट गरी घाईते बनाएको जिल्ला प्रहरी कार्यालय गोरखाका प्रहरी नायव उपरिक्षक एवं सूचना अधिकारी प्रकाश दाहालले जानकारी दिए ।
आरुघाट गाउँपालिका ४ को कोखटारमा घर निर्माण गर्दै आएका शाहले रातको समयमा गुरुङ सुतिरहेको स्थानमा जबरजस्ती ढोका फोडी मरणासन्न हुने गरी आमा छोरीलाई कुटपिट गरेका थिए । स्थायिनले बेहोस अवस्थामा उद्वार गरी स्थायिन स्वास्थ्य संस्थामा उपचार संम्भव नभए पछि थप उपचारको लागी राजधानीको ग्रिन सिटी अस्पतालमा आईसियुमा उपचार भई रहेको प्रहरीले जनाएको छ ।
घाईते दुवैको टाउको, आँखा, घाँटी तथा शरिरको विभिन्न भागमा चोट देखिएको गोरखा प्रहरीले जनाएको छ ।
कुटपिट गरेर भारत तर्फ भाग्दै गर्दा शाहलाई पर्सा प्रहरीको समन्वयमा नेपाल भारतको सिमावर्ती क्षेत्रबाट पक्राउ गरी ज्यान मार्ने उद्योग अन्तरर्गत मुद्वा दर्ता गरिएको र गोरखा जिल्ला अदालतबाट १० दिनको म्याद थप लिएर अनुसन्धान सुरु गरिएको गोरखा प्रहरीले जनाएको छ ।