गोरखा । यस बर्ष गोरखाको उत्तरी क्षेत्रमा ढुवानी गर्नुपर्ने चामलको ठेक्का लाग्न सकेको छैन । आर्थिक बर्षको ४ महिना बिती सक्दा पनि उत्तरी गोरखाको सिर्दीबासमा ढुवानी गनुपर्ने चामलको ठेक्का लाग्न नसकेको हो ।
खाद्य ब्यवस्था तथा ब्यापार कम्पनी लिमिटेड गोरखा शाखाले पटक पटक गरेको ठेक्का लाग्न नसकेको कम्पनीकाको गोरखा शाखाले जानकारी दिएको छ । शाखाका अनुसार पहिलो पटक असारको २२ गते सूचना प्रकाशन गरिएको भएता पनि कोही कसैले पनि ठेक्का नहाले पछि पुनः असोज २५ गते सूचना प्रकाशन गरिएको हो ।
दोस्रो पटक सूचना प्रकाशन गर्दा ३ जना ठेकेदारले प्रस्ताव पेश गरेको भएता पनि प्रधान कार्यालयले अहिलेसम्म पनि स्विकृत नगरेको शाखाका शिव सुनारले जानकारी दिए ।
डिपोमा तत्कालै खाद्यान्न अभाव नहुने भएता पनि समयमा नै ठेक्का लाग्न नसकेको खण्डमा उत्तरी गोरखामा चामलको अभाव हुने निश्चित छ ।
शाखाले दिएको जानकारी अनुसार आइतबार सम्म सिर्दीबास डिपोमा १२० क्विन्टल चामल बाँकी रहेको छ ।
उत्त डिपोले नुमनुब्री गाउँपालिका भित्रको सिर्दीबास, चुम्चेत, छेकम्पार, बिही, प्रोक, ल्हो र सामागाउँलाई चामल बिक्री गर्दै आएको छ ।
