गोरखा । गोरखाको जिल्ला प्रशासनमा केही दिन यता नागरिकता लिनेको भिड देखिन थालेको छ ।
दशै बिदामा घर आएकाहरु तथा ईडिभी परेका र विभिन्न सरकारी निकायमा जागिर खुलेका कारण नागरिकता लिनेको भिड लागेको प्रशासनले जनाएको हाे ।
अन्य बेलामा दैनिक २० देखी ३० वटा मात्र नागरिकता बितरण गर्दै आएको प्रशासनले दशै बिदा लगत्तै दैनिक १०० भन्दा बढी नागरिकता वितरण गर्न थालेको कार्यालयका प्रशासकिय अधिकृत गणेशप्रसाद भट्टराईले बताए ।
जिल्ला बाहिर बसेर अध्ययन गरेका तथा कामका सिलसिलामा जिल्ला बाहिर भएकाहरुले यो बेला नागरिकता निकाल्ने गरेका कारण पनि केही दिनयता भिड बढेको जिल्ला प्रशासन कार्यालय गोरखाले जनाएको छ ।
‘अहिले धेरै जसो सरकारी निकायमा जागिर खुलेको छ । त्यस कारण पनि नागरिकता बनाउनेहरुको भिड लागेको’ भन्दै ‘अबदेखी बृद्व भत्ता पाउनेहरुले पनि नागरिकता बनाउन आएको’ अधिकृत भट्टराईले बताए । अहिले नयाँ नागरिकता निकाल्ने र प्रतिलिपी निकाल्नेको पनि उत्तिकै भिड प्रशासनमा देख्न सकिन्छ छ ।
कार्यालयले बिहीबार १०७ वटा नयाँ र ६४ वटा प्रतिलिपी वितरण गरेको थियो भने शुक्रबार ३ बजे सम्म ८८ जनाले नयाँ नागरिकता लिएको छ । समय अभावका कारण केही मानिसहरु फर्किएको पनि कार्यालयले जानकारी दिएको छ ।
शुक्रबार भने ४४ जना पुरुष र ४४ जना महिलाले नागरिकता लिएको कार्यालयले जनाएको छ ।
कार्यालयले दिएको जानकारी अनुसार साउन, भाद्र र असोज महिनामा मात्रै २ हजार ७११ जनाले नागरिकता निकालेको छ ।